O teito de gasto para 2026 aprobarase no Parlamento o próximo luns nun pleno extraordinario

O Parlamento autorizará o vindeiro luns, 4 de agosto, o teito de gasto non financeiro para os orzamentos de 2026 nun pleno extraordinario que foi convocado este mércores entre críticas da oposición. A oposición di que descoñece esta cifra porque aínda non foi aprobada polo Consello da Xunta.

O Goberno galego ten previsto celebrar este venres unha reunión para aprobar o teito de gasto, é dicir, os recursos máximos dispoñibles para 2026, polo que marca o límite para os orzamentos autonómicos. Os partidos da oposición reprochan que só contarán cunha fin de semana para estudar o informe que será debatido o luns no Parlamento.

O pleno extraordinario celebrarase ás 13 horas e contará cunha intervención inicial do conselleiro de Facenda Miguel Corgos por un máximo de 15 minutos, seguida polas dos representantes dos distintos grupos, con dez minutos para cada un e sen réplica posterior.

Tras a Xunta de Portavoces desta mañá, a viceportavoz parlamentaria do BNG Olalla Rodil lamentou que os grupos da oposición non saben nin sequera o que van debater e canto pode gastar a Xunta para 2026 porque non teñen nin absoluta idea do que vai aprobar o Goberno galego na súa reunión deste venres.

Ao seu xuízo, esta é unha mostra máis de como entende o PP a democracia, co Parlamento sometido sempre aos intereses do partido.

Olalla Rodil augurou que o venres a Xunta sairá a anunciar un orzamento histórico e o máis social, a pesar de que as contas públicas galegas son papel mollado e teñen pouca credibilidade, ademais de que o seu debate tapa outro de fondo sobre o sistema de financiamento autonómico absolutamente inxusto para Galicia, que o BNG pide negociar bilateralmente co Estado.

No PSdeG, a viceportavoz Elena Espinosa considerou que o documento do teito de gasto é moi complexo e faría falta moitísimo máis tempo que dous días para estudalo, pero: "Este é un dos atropelos máis aos que estamos sometidos os grupos da oposición", reprochou.

Espinosa criticou, ademais, que a Xunta queira debater sobre este límite orzamentario mentres incumpre a regra de gasto e gasta sen control e sen mellorar os servizos públicos.

O deputado do Grupo Mixto Armando Ojea coincidiu en que esta non é a mellor maneira de traballar sobre un documento tan importante.

A viceportavoz parlamentaria do PPdeG Cristina Sanz xustificou, fronte ás críticas da oposición pola présa da convocatoria, que xa hai antecedentes noutros anos e que os servizos xurídicos foron consultados e determinaron que era plenamente acorde co procedemento convocar o pleno aínda que non fose aprobado o teito de gasto que se vai debater.

Sanz defendeu esta tramitación como o primeiro paso para que Galicia volva ter un ano máis un orzamento en tempo e forma, que é unha demostración de estabilidade política que contrastou cun Goberno central sen visos de poder sacar adiante unhas contas públicas para 2026.