O Goberno estuda crear catro áreas de tren de proximidade: na Coruña e en Vigo, no Eixo Atlántico e outra interior

O ministro de Transportes e Mobilidade Sostible Óscar Puente avanzou este mércores que o estudo de análise para levar o servizo de proximidade a Galicia prevé, de maneira preliminar, establecer unha zona neurálxica na Coruña e outra en Vigo, que formarán parte das catro zonas principais e a área complementaria con que o Executivo pretende deseñar a mobilidade cotiá no país.

Así o trasladou Puente durante a súa intervención no Congreso nunha interpelación formulada polo deputado do Bloque Nacionalista Galego Néstor Rego sobre o estado dos trens en Galicia, na que o ministro insistiu en que a información trasladada debe tratarse con cautela, posto que o estudo segue en fase de desenvolvemento.

"Sen entrar en profundidade, si que lle direi que se están estudando catro zonas principais, e tómeno, por favor, con cautela ata que non estea o estudo aprobado de maneira definitiva. Son catro zonas principais e unha zona complementaria. Unha área de proximidade da Coruña, unha área de proximidade de Vigo, a liña atlántica global, a liña de interior e o complemento de ancho métrico", explicou o ministro.

Puente sinalou que o documento segue analizando todos os tráficos posibles en Galicia, non só os de proximidade, senón tamén os rexionais que vertebren a comunicación ferroviaria do país.

Sobre o texto, trasladou que a intención do Ministerio de Transportes e Mobilidade Sostible é concluílo antes de que termine 2025 e presentalo antes de 2026.

Iso demostra, segundo Puente, o firme compromiso do Goberno coa mellora das comunicacións ferroviarias nunha zona en que, por mor da súa complexa orografía, se avanza máis lento do que gustaría.

"Avánzase. En materia de infraestruturas ferroviarias, os avances son máis lentos do que nos gustaría, pero en perspectiva son avances importantes e van a boa velocidade. Galicia ten unha orografía moi complexa e calquera avance require un maior esforzo orzamentario e de complexidade e enxeñería que noutros territorios", recoñeceu.

Puente mostrouse disposto a seguir avanzando de maneira construtiva co BNG para cumprir os acordos e mellorar as infraestruturas ferroviarias galegas.

O BNG reclama máis frecuencias, puntualidade e horarios adaptados

Pola súa banda, Néstor Rego denunciou as décadas de abandono do transporte de trens por parte dos diferentes gobernos do Estado do PP e o PSOE —aínda con boas palabras para a actuación do actual Executivo—, o cal derivou en atrasos importantes no país nesa materia.

"Precisamos infraestruturas de servizos adecuadas. Non desprezamos a conexión de alta velocidade en Madrid, pero reiteramos, porque é verdade e constatado, que a principal preocupación é resolver a mobilidade por razón laboral", subliñou durante a súa intervención, na que insistiu na importancia de acelerar a chegada do tren de proximidades e de modernizar a rede ferroviaria interna.

En concreto, sinalou que Ferrol é a cidade de Galicia peor comunicada por ferrocarril, cun tempo estimado de 1 hora 20 minutos para facer os 68 quilómetros que a separan da Coruña.

Rego reclamou máis frecuencias, horarios adaptados, prezos máis baixos e un plan para acabar coas demoras, e tamén que se recuperen algúns servizos suspendidos durante a pandemia, como o traxecto nocturno Monforte-Barcelona.

Puente sinala que as prazas de tren entre Madrid e Galicia aumentaron un 109 % en 2025

O ministro de Transportes tamén destacou de que no último ano incrementáronse un 109 % as prazas de tren dispoñibles entre Madrid e Galicia.

"Teño que celebrar as melloras na oferta que realizamos desde hai un ano, cando entraron en servizo os novos servizos 106", sinalou o ministro, que continuou explicando que con esa nova oferta o número de prazas en ferrocarril chegou ás 68.500 prazas semanais, un 109 % máis que en exercicios anteriores.

O ministro detívose en debullar o número de trens circulando entre ambos os puntos citados en día laborable: vinte e dous. Os sábados hai catorce circulacións e os domingos dezaseis.

E engadiu que o Goberno de Pedro Sánchez leva investidos 1.600 millóns de euros en infraestrutura ferroviaria en Galicia -desde xuño do 2018 a xuño de 2025- en actuacións que permitirán mellorar as conexións entre as cidades galegas máis importantes, así como as súas estacións.

Ademais, citou a mellora da puntualidade, que no Corredor de Galicia achégase ao 90 %, o cal a sitúa por encima da media española.

Puente citou avances, “máis lentos do que nos gustaría, pero importantes e a boa velocidade”: impulso ao Corredor Atlántico; modernización de liñas entre cidades; fomento da estación de Santiago; abonos que aforraron 68 millóns de euros aos usuarios.

“En canto á seguridade, é a nosa absoluta prioridade, ningún parámetro está por encima, e en Galicia, coa implantación do RTMS, avanzamos máis que noutros territorios”, sinalou tamén Puente, en referencia ao Sistema Europeo de Xestión de Tráfico Ferroviario, deseñado para mellorar a seguridade e o control automático dos trens.