O Supremo tomba o veto a outro parque eólico e avala a tramitación da Xunta
Revoga a sentenza do TSXG que anulou o eólico Bustelo e descarta fragmentación ilegal
Alfonso Rueda ve "unha boa noticia para Galicia" a sentenza, que "desbloquea" uns 80 parques eólicos, e lamenta o "tempo perdido"
O presidente da Xunta subliñou que é a quinta vez que o Supremo se pronuncia de forma similar, esperando que "sexa a definitiva"
A Sección Quinta da Sala do Contencioso-Administrativo do Tribunal Supremo estimou os recursos de Xunta, Greenalia e Asociación Eólica de Galicia para revogar unha sentenza do Tribunal Superior de Xustiza de Galicia (TSXG) de 2023 que anulou o proxecto do parque eólico Bustelo, entre Carballo e Coristanco (A Coruña), ao considerar que existía unha fragmentación ilegal do proxecto, cuestión que agora se descarta.
E para iso o Supremo válese dos fundamentos xa aplicados en marzo de 2025 no caso similar do eólico Campelo, entre Santa Comba e Coristanco, ao "ser idénticos os motivos esgrimidos en ambos os recursos de casación e iguais as cuestións consideradas de interese casacional obxectivo".
O alto tribunal válese dese ditame en que se sinalaba que "o feito de que dúas ou máis instalacións de parques eólicos compartan instalacións de conexión non comporta, ineludiblemente", que haxa un único proxecto a efectos da súa avaliación medioambiental. Por iso, agora con Bustelo o Supremo falla que "procede reafirmar os criterios xurisprudenciais fixados na anterior sentenza".
Así, o Supremo considera que a sentenza do Tribunal Superior de Galicia, impugnada en casación, apártase da doutrina xurisprudencial referida e non se axusta a dereito, polo que se revoga. Por tanto, confirma a legalidade do acordo administrativo que autorizou o parque eólico de Bustelo, de 45 megawatts e cun investimento previsto de 45 millóns de euros.
Sentenzas previas favorables
Tanto por mor do ditame do TS de 2025 como o ditame do TXUE, tamén de 2025, no que se deu a razón á Xunta na tramitación de eólicos -considerou que non hai obrigación de dar acceso público a informes sectoriais-, o sector eólico mostrou a súa satisfacción e asegurou que se abría a porta ao desbloqueo de proxectos suspendidos preventivamente polo TSXG. Con todo, decenas de eólicos continúan paralizados actualmente de forma provisional por motivos medioambientais.
Neste contexto, recentemente a nova presidenta da Sala do Contencioso-Administrativo do Tribunal Superior de Xustiza de Galicia (TSXG), María Azucena Recio González, tomou a polémica decisión de apartar ao xuíz Luís Villares da sección terceira da Sala do Contencioso do alto tribunal galego, que paralizou decenas de proxectos eólicos nos últimos tempos, para pasar á sección cuarta.
Uns traslados forzosos que afectan a catro maxistrados entre as seccións terceira e cuarta, os cales foron recorridos ante o Consello Xeral do Poder Xudicial (CXPX).
De tal forma, o Supremo revoga o fallo do TSXG que estimou un recurso da asociación ecoloxista Adega e que apuntaba a unha fragmentación indebida da avaliación ambiental de proxectos de tres parques eólicos -Campelo, Monte Toural e Bustelo-, pois opinaba que non eran autónomos, cuestión que agora se revoga.
Alfonso Rueda fala dunha "boa noticia", pero lamenta o tempo perdido
O presidente da Xunta, Alfonso Rueda, celebrou a sentenza do Tribunal Supremo que "desbloquea" uns 80 parques eólicos na comunidade, asegurando que é "unha boa noticia para Galicia", aínda que lamentou o "tempo perdido".
Na súa intervención na asemblea anual da Agrupación industrial de Empresas de Automoción e Mobilidade de Galicia (Ceaga), en Vigo, o líder autonómico reaccionou ao ditame publicado nas últimas horas, considerando "inxusta" a situación dos devanditos parques ata a data e poñendo en valor este "desbloqueo".
"Imos poder desenvolver os nosos recursos, a nosa potencia, para que a enerxía que se produce aquí abasteza en primeiro lugar ás industrias que están aquí, de forma máis segura e máis barata", reivindicou.
O presidente galego subliñou que é a quinta vez que o Supremo se pronuncia de forma similar, esperando que "sexa a definitiva" e criticando o "tempo perdido" por decisións previas que "ninguén entende" ou que "se entenden dabondo", dixo.
O sector considera que o fallo abre a porta ao desbloqueo da enerxía eólica na comunidade, e confía en que canto antes se poidan resolver os máis de 200 contenciosos que agora mesmo teñen paralizados uns 3.000 magawatts en Galicia.
