O Supremo rexeita que as empresas limiten a 5 días por ano o permiso para coidado de familiar

O Tribunal Supremo avala que o permiso retribuído de cinco días por enfermidade grave ou hospitalización non ten límite anual por traballador, actívase con cada novo feito causante e pode continuar tras a alta hospitalaria se o familiar require repouso domiciliario ou coidados efectivos.

Nunha sentenza datada o pasado 25 de setembro, a sala do social desestima o recurso de casación interposto polas empresas do Grupo RACE contra unha sentenza de marzo de 2025 da Audiencia Nacional que respondía a un procedemento de conflito colectivo iniciado a pedimento de UXT, CCOO e CSIF.

As empresas do grupo pretendían aplicar dúas limitacións restritivas ao permiso retribuído de 5 días por accidente, enfermidade grave, hospitalización ou intervención cirúrxica de familiares/conviventes.

O primeiro era restrinxilo a un máximo de 5 días laborables ao ano por traballador, independentemente de que ocorresen varios feitos causantes no mesmo exercicio.

Ademais, pretendían vincular a súa duración á alta hospitalaria, de modo que se extinguise de forma automática no momento en que o familiar recibise a alta hospitalaria, sen estendelo ao repouso domiciliario posterior.

O Supremo constata que o Estatuto dos Traballadores non establece un límite máximo de días ao ano, e destaca que cando o lexislador quixo fixar un tope anual, como no permiso por forza maior de 4 días ao ano, fíxoo de forma explícita.

A directiva comunitaria aplicable establece un estándar ou mínimo de protección de 5 días ao ano por traballador, e ao tratarse dunha directiva é de harmonización mínima, os Estados membros poden manter ou introducir condicións máis favorables para as persoas traballadoras.

Deste xeito, cada novo feito causante que concorra no ano outorga o dereito para usar o permiso de ata 5 días.

A Sala apunta que a clave do permiso non é a estadía física no hospital, senón a necesidade de atención e coidados efectivos do paciente; por iso, a alta hospitalaria non extingue automaticamente o dereito ao permiso se o paciente non ten a alta médica e require repouso domiciliario ou coidados continuados no fogar.

Todo iso leva a considerar que persisten os requisitos do permiso mentres o familiar non estea curado ou dado de alta médica definitiva, de modo que o supremo conclúe que os empregados poden facer uso do permiso cada vez que suceda un feito causante no ano.

E non só iso, senón continuar co permiso tras a alta hospitalaria se o familiar precisa repouso domiciliario e coidados efectivos.