O Supremo dos EUA inclínase por apoiar a lei que pecharía TikTok no país en 10 días

O Tribunal Supremo dos Estados Unidos inclinouse este venres por apoiar a lei que podería pechar a rede social TikTok no país se non se separa da súa empresa matriz, a chinesa ByteDance, antes do 19 de xaneiro, como estipula a norma.

O Alto Tribunal celebrou este venres unha audiencia, a pedimento da plataforma, que durou preto de 3 horas, para estudar se a lei vai en contra da Primeira Emenda da Constitución dos EUA (que recolle a liberdade de expresión), como alega TikTok. Ou se, pola contra, prevalece a protección da seguridade nacional fronte a unha posible intromisión do Goberno chinés, como defende a Administración federal.

"A lei só diríxese a esta empresa estranxeira (ByteDance) que non ten dereitos da Primeira Emenda", dixo a maxistrada progresista Kagan.

A norma, aprobada polo Congreso en abril de 2024 por demócratas e republicanos, deu a ByteDance nove meses para atopar un investidor dun país que non sexa considerado un "adversario" dos Estados Unidos para vender as súas operacións.

Despois de superar todas as fases xudiciais noutros tribunais e que non fallasen ao seu favor, os creadores de TikTok e da empresa pediron ao Alto Tribunal que revisara a constitucionalidade da lei.

Ademais alegaron que o feito de que a lei entrase en vigor o último día de Joe Biden como presidente do país, antes de que o republicano Donald Trump sexa investido o día 20, facía "especialmente apropiada" a idea de, polo menos, aprazar a prohibición.

Durante a primeira parte da audiencia, na que participaron o avogado da plataforma e outro en representación de creadores de contido, os maxistrados centraron o debate no poder que o Goberno chinés ten con TikTok.

De feito, o maxistrado Brett Kavanaugh replicoulle ao avogado de TikTok, que pedía respectar a liberdade de expresión, que A China a través da rede social podería "desenvolver espías e converter e chantaxear" os mozos estadounidenses.

"A preocupación existente é que están a regular un medio de comunicación", engadiu o maxistrado John Roberts.

Pola súa banda, Noel Francisco, representante de TikTok, defendeu que a norma supoñía abrir a porta á censura e que ía en contra da liberdade de expresión da empresa e dos usuarios.

"Non se podería ir á CNN ou a Fox News e dicirlles: "Imos regular porque estades a manipular os contidos dunha maneira que non nos gusta...", afirmou.

Unha das opcións que propuxeron os maxistrados foi outorgar máis tempo á plataforma para desvincularse da súa empresa matriz para que TikTok poida seguir funcionando no país, pero non convenceu á defensa: "Sería excesivamente difícil en calquera prazo".

A fiscal Elizabeth Prelogar expuxo que a recompilación de datos e a manipulación de contidos que, segundo asegurou, fai TikTok, son ameazas para a seguridade nacional. E aínda que algúns maxistrados mostraron certo escepticismo polos seus argumentos sobre a manipulación dos contidos, Prelogar dixo que as evidencias de recompilación de datos xa son suficientes para que o Tribunal apoie a lei.

Dados os prazos, o Supremo actuou cunha inusual rapidez neste caso, polo que se espera que poida decidir rapidamente que fai coa norma e xa máis adiante emitir unha opinión máis extensa. Se o tribunal acaba dando o visto e prace á norma federal, TikTok apagarase o próximo 19 de xaneiro, xa que os creadores advertiron que se ByteDance perde o xuízo, pecharán a plataforma.

O futuro presidente do país, Donald Trump, que tentou prohibir a rede social durante o seu primeiro mandato (2017-2021), pediu ao Supremo que paralizase a entrada en vigor da lei ata que el estivese no cargo. O republicano, que durante a campaña electoral dixo que "salvaría TikTok", reuniuse co director executivo de TikTok, Shou Zi Chew, na súa residencia en Mar-a-Lago (Florida), segundo informaron algúns medios.