O Supremo continúa este luns as declaracións do caso Koldo, co foco en Servinabar e Acciona

O maxistrado do caso Koldo no Tribunal Supremo prosegue coas declaracións de empresarios imputados este luns, co dono de Servinabar e un exdirectivo de Acciona polo presunto pago de comisións ao exsecretario de Organización do PSOE Santos Cerdán, ao exministro de Transportes José Luis Ábalos e ao que fora o seu asesor Koldo García a cambio de obras públicas.

A partir das 10:00 horas, o maxistrado Leopoldo Puente citou a Joseba Antxón Alonso, como administrador único de Servinabar, e a Fernando Merino, exdirectivo de Acciona en Navarra.

O maxistrado imputou varios empresarios á vez que a Santos Cerdán ao considerar que poderían intervir na indebida adxudicación de obras públicas concretas a favor das súas respectivas empresas mediante a realización de pagos que, en parte, podería recibir Ábalos, cuxa condición de aforado implica que o Supremo investigue a causa xunto á Audiencia Nacional.

Puente dirixiuse contra Alonso, Merino, José Ruz e os irmáns Daniel e Antonio Fernández Menéndez tras recibir o informe da Unidade Central Operativa (UCO) da Garda Civil que destapou unha presunta trama de corrupción baseada en amaños de obras que estaría integrada por Cerdán, como suposto xefe, Ábalos e Koldo. Para acordar investigalos apoiouse en boa medida nas conversacións que o exasesor gravou entre 2019 e 2023 cos outros dous implicados.

O contrato privado de Servinabar

Ao rexistrar a vivenda de Alonso, administrador único de Servinabar, os axentes acharon un contrato privado de compravenda no que consta que Cerdán adquiriría por 6.000 euros unhas 1.350 participacións, o 45 %, desa empresa, que segundo a UCO se fixo con obras do Goberno navarro por máis de 75 millóns de euros.

A defensa de Cerdán subliñou que non se trata dunha escritura senón dun mero contrato privado que non se chegou a elevar a público e, por tanto, non tivo efecto xurídico ningún.

Ao declarar, o exdiputado dixo coñecer o contrato privado, pero insistiu en descartar que teña validez e asegurou que nin sequera chegou a realizar o pago por esas participacións sociais.

A súa relación con Cerdán

Cerdán declarou que coñecía a Alonso desde 2006 pero que cara a 2011 tiñan xa unha relación bastante forte de amizade, porque falaban moito de política. "É unha persoa que vén do mundo nacionalista, simpatizante ou da contorna do PNV", polo que analizaban as relacións que podían ter diferentes partidos para que un día en Navarra non gobernasen as dereitas, expuxo.

Describiuno como fundamental nas conversacións tanto co PNV como con EH Bildu para chegar ao Goberno. De feito, dixo que lle facilitou a interlocución con ese segundo partido porque era do mesmo lugar ca Arnaldo Otegi: "Abriume as portas".

Pero Cerdán negou relación con Servinabar e ligou o contrato privado a que o PSOE acababa de apañar o peor resultado da historia en Navarra e el, como director de campaña, era o responsable dese fracaso e pensou abandonar a política, algo que lle comentou a Antxón, que lle ofreceu seren socios.

"Asinamos", admitiu, pero a fin de semana falouno coa súa muller, que lle dixo que non abandonase a política e que, se o facía, regresase ao seu traballo como técnico de mantemento. Tras iso, ordenou a Antxón que rompese o documento.

O exdirixente engadiu que en 2017, cando recalou en Madrid, compartiu piso con Alonso por uns 800 euros de renda mensual e que un durmía nun cuarto e o outro no salón, detallou.

Negou calquera xestión a favor de Servinabar e indicou que cando se creou, en 2015, o PSOE estaba na oposición. "Dificilmente podo interceder, axudar de ningunha maneira a ningunha empresa", expuxo.

Os vínculos de Servinabar e Acciona

A UCO indicou no seu informe que Servinabar e Acciona participaron nunha Unión Temporal de Empresas (UTE) que se presentou a varias adxudicacións públicas de Navarra, unha delas as obras do túnel de Belate, que lograron por 76 millóns de euros.

Trátase dun dos maiores contratos de obra pública adxudicados en Navarra na última década, segundo a acusación popular exercida polo partido Unión do Pobo Navarro (UPN).