O Supremo apela ao "interese público" e "humano" para non frear a regularización de migrantes

O Tribunal Supremo argumenta que existe un "interese público notorio" na regularización extraordinaria de migrantes que impulsa o Goberno, que incide nun "substrato humano" e "transcende á mera consideración económica", como un dos motivos para non frear a entrada en vigor deste real decreto lei.

Este é un dos argumentos esgrimidos pola Sala do Contencioso do Tribunal Supremo para rexeitar os recursos ao real decreto presentados pola Comunidade de Madrid e Vox, segundo senllos autos que se deron a coñecer este xoves.

Así, o Supremo considera que o "interese público" que xustifica non frear a regularización "susténtase en distintas xustificacións de carácter humanitario e de respecto aos dereitos humanos con especial énfase na protección dos menores, de carácter económico, carácter demográfico, carácter cultural e social".

Ademais, o alto tribunal apunta que, de paralizarse este decreto, "resultarían afectados intereses de terceiros como son as propias persoas solicitantes das autorizacións", xa que a suspensión "lles determinaría a seguir na situación de irregularidade administrativa".

En calquera caso, o Supremo advirte que as actuacións xurídicas creadas "ao amparo da norma" non son irreversibles e subliña que as autorizacións outorgadas teñen vixencia de só un ano, o que "impediría ulteriores efectos" ante unha eventual sentenza estimatoria.

Para rexeitar os argumentos esgrimidos pola Comunidade de Madrid no seu recurso, o Supremo subliña que "non pode afirmarse" que haxa "prexuízos de imposible ou difícil reparación", como o suposto colapso nos servizos públicos do que advertiu o Goberno rexional de Isabel Díaz Ayuso.

O Alto Tribunal subliña, ademais, que "a nulidade" deste real decreto "non resulta manifesta nin pode apreciarse con toda evidencia hoxe por hoxe procesual" e resolver sobre este aspecto supoñería "anticipar absolutamente o debate de fondo" en "un momento e ámbito procesalmente improcedente".