O subcomité clínico proporá estender o certificado covid en colexios e hospitais

Ante o incremento sostido dos casos activos en Galicia, o subcomité clínico redobra a vixilancia e traballa no deseño de novas medidas.

"Temos identificados os dous grupos de idade onde temos a incidencia maior, é dicir, en que o virus está circulando máis: entre os menores de 12 e no grupo de idade de entre 30 e 50 anos", explica Pilar Farjas, membro do equipo de expertos que asesora a Xunta pola pandemia.

Entre os de 30 e 50 hai entre un 14 % e un 17 % de non vacinados. E no seguimento dos contactos vese como os infestados desa franxa de idade son, na maioría dos casos, os pais dos nenos escolarizados. Forman pequenos gromos familiares que poñen en risco os máis vulnerables, porque en UCI a maioría seguen sendo os de maiores de 70.

"Xa se vacinaron os maiores de 80 anos e estamos acelerando a terceira dose para maiores de 70, porque os datos din que o risco de gravidade segue manténdose nesa franxa de idade", engade Farjas.

A segunda liña de traballo é estender o uso do certificado covid nos ámbitos hospitalario e educativo, agora mesmo os contextos máis vulnerables.

"É o obxectivo do certificado covid: reducir ao máximo a posiblidade de que entre en contacto nestes dous ámbitos".

Propoñerano os membros do subcomité clínico para acompañantes nos hospitais de día, unidades de diálise e de transplantes, hospitais de pacientes; e tamén nos centros escolares para monitores, pais ou visitantes.

Para os traballadores habituais a opción será ou certificado ou PCR frecuente, como se fai xa nas residencias sociosanitarias.

A consellería avaliará estes consellos dos expertos tras a reunión que celebran este venres.