O sector turístico encara o ano con optimismo
O sector turístico encara o ano con optimismo
O Clúster de Turismo prevé que a recuperación se acelere a partir da Semana Santa
No segundo semestre de 2021 recuperaron cifras de ocupación anteriores á pandemia
A recuperación do sector turístico chegou na segunda metade do ano pasado, e chegou con forza: con máis de 3 millóns e medio de visitantes, Galicia colocouse como a terceira comunidade do estado en viaxeiros e pernoitas en 2021.
Xunta e Clúster de Turismo preparan a estratexia para que este ano sexa aínda mellor. Consolidada Galicia como destino seguro, o obxectivo é recuperar o turismo internacional.
"Todo fai pensar que, co avance da vacinación, volveremos a cifras de ocupación incluso superiores ás de 2019", afirma Cesáreo Pardal, presidente do Clúster.
O tirón do Xacobeo vai axudar á recuperación do turismo internacional. Polos datos da Consellería de Turismo, en 2019 o 60 por cento dos peregrinos viñan de fóra. En 2021 os estranxeiros foron só o dez por cento. Para 2022, a perspectiva mellora. "Así o din as axencias de viaxes especializadas", afirma o conselleiro Alfonso Rueda, e engade que "hai moitísimas reservas".
E para consolidar o turismo interno, haberá unha nova convocatoria do bono turístico. Está por definir a porcentaxe de axuda e se se restrinxe a determinadas épocas do ano, explicou Rueda, detalles que -dixo- perfilarán nas próximas semanas.
