O Río Breogán agarda manter a senda positiva xogando como visitante

O Breogán xoga o mércores en Zaragoza, un rival directo pola permanencia. Mrsic, que esta semana puido traballar con todo o equipo, non quere pensar aínda no derbi da fin de semana contra o Obradoiro.

O Río Breogán amosouse infalible nos partidos como visitante contra os rivais que tamén pelexan por evitar o descenso e tentará seguir na mesma liña. Agora mesmo sácalle tres triunfos ao Zaragoza e meter un cuarto partido sería coller unha marxe que daría moita tranquilidade para as vindeiras xornadas. Un triunfo tamén permitiría manter o soño de xogar a Copa por segundo ano consecutivo.