O rei de Xordania inicia a súa visita a España cunha reunión con Filipe VI na Zarzuela
Abdalá II de Xordania tamén se reuniu con Pedro Sánchez para asinar un acordo de Asociación Estratéxica e pedir un cesamento do fogo en Gaza
O rei Filipe VI recibe o rei de Xordania, Abdalá II (Marta Fernánde /Europa Press)
O presidente do Goberno, Pedro Sánchez, e o rei de Xordania, Abdalá II, elevaron as relacións bilaterais ao nivel de Asociación Estratéxica, o máximo que poden manter dous países, ao asinar en Madrid a declaración que así o establece.
Esta Asociación Estratéxica reforzará os vínculos políticos, económicos, sociais, culturais, de cooperación e de defensa entre os dous Estados, e culmina así un proceso que iniciaron o propio presidente do Goberno e o rei de Xordania en 2023.
Abdalá II de Xordania iniciou a súa visita a España cun encontro co rei Filipe VI no Palacio da Zarzuela, residencia oficial do monarca, e despois reuniuse con Sánchez no Palacio da Moncloa.
A situación que vive Gaza ante os ataques israelís e a necesidade de que siga crecendo o apoio á solución dos dous Estados, Israel e Palestina, son temas que estiveron tamén sobre a mesa no encontro.
Sánchez e o rei de Xordania fixeron chamadas continuas a un cesamento do fogo, a que se permita a entrada de axuda humanitaria en Gaza e a avanzar cara á paz e a estabilidade na rexión sobre a base da solución dos dous estados.
