O PSOE impulsa unha lei no Congreso para apartar xuíces que se pronunciaron politicamente

O PSOE presentou no Congreso unha proposición de lei orgánica de reforma do Código penal para que os xuíces e maxistrados poidan ser apartados en caso de posicionarse politicamente en contra das institucións públicas e os seus representantes.

Na súa reforma, recollida por Europa Press, os socialistas inclúen unha nova causa de abstención e recusación para dar cabida a actuacións que leven a cabo xuíces e maxistrados na súa calidade de representantes dun poder do Estado "que poden afectar á súa aparencia de imparcialidade".

En concreto, as causas para apartar a xuíces e maxistrados virían dadas cando "realicen manifestacións públicas, invocando a súa condición ou servíndose da mesma, contra actuacións desenvolvidas por autoridades ou funcionarios públicos, sindicatos, asociacións ou outras entidades públicas ou privadas que sexan parte no procedemento, dirixirse a eles de forma privada con tal finalidade ou participar en actos ou concentracións co mesmo obxectivo".

O xuíz deixa de ser imparcial

Isto, segundo argúen os socialistas, "non só pode afectar o dereito a un xuíz imparcial, contido indispensable do dereito fundamental á tutela xudicial efectiva, senón tamén á propia imaxe de independencia do Poder Xudicial".

A proposición de lei tamén busca derrogar o artigo 525 do Código penal, que fai referencia ao delito contra as ofensas relixiosas. En concreto, pide acabar coa pena de multa de oito a doce meses a quen, "para ofender os sentimentos dos membros dunha confesión relixiosa, fagan publicamente, de palabra, por escrito ou mediante calquera tipo de documento, escarnio dos seus dogmas, crenzas, ritos ou cerimonias, ou vexen, tamén publicamente, a quen os profesa ou practican".

O caso de Lalachús

Os socialistas xa rexistraron unha lei para suprimir o devandito artigo en xaneiro deste ano, despois das badaladas e a denuncia contra a cómica Lalachús por unha estampa da becerra do 'Gran Prix'. Aquela proposta incluía outra reforma para limitar a actuación das acusacións populares, que nesta nova proposición de lei foi suprimida esa parte e substituída pola recusación de xuíces por falta de imparcialidade.

Mentres tanto, segue 'na neveira' do Congreso unha reforma impulsada en decembro de 2023 por Sumar para eliminar o delito contra as ofensas relixiosas do Código penal, xa que engadía a supresión doutros delitos como as inxurias á Coroa e o enaltecemento do terrorismo, sobre os que o PSOE ten reparos, provocando a prórroga sucesiva dos prazos de emendas.