O PSOE expulsa a Nicolás Redondo Terreros por "reiterado menosprezo ás siglas"

 O PSOE expulsou do partido ao que foi líder do PSE Nicolás Redondo Terreros por "reiterado menosprezo ás siglas" desta formación, nunha decisión tomada na Executiva Federal do pasado luns, segundo confirmaron fontes socialistas este xoves.

Estas mesmas fontes sinalan que Redondo "non fixo alegacións para defenderse durante o proceso" e subliñan que os oito millóns de votantes socialistas "merecen un respecto e tamén unha organización con 140 anos de historia".

Con todo, Redondo asegurou que coñeceu a súa expulsión do PSOE polos medios de comunicación e negou que actualmente tivese aberto un expediente no partido, xa que afirma que o que lle abriron por aparecer xunto á presidenta madrileña, Isabel Díaz Ayuso, nun acto institucional en 2021 quedou pechado.

Pero fontes socialistas din que a Comisión de Ética e Garantías do PSOE abriu un segundo expediente a Redondo hai semanas, sen concretar a data exacta, e que a Executiva Federal decretou a súa expulsión do partido na súa reunión do pasado luns, despois de que o exlíder do PSE non presentase alegacións no prazo previsto para iso.

Ademais, estas fontes non aclaran se a expulsión foi motivada por declaracións concretas de Redondo, limitándose a dicir que "están en toda a prensa nacional".

Nos últimos meses, Redondo converteuse nunha das voces máis representativas dos socialistas críticos coa xestión do presidente de Goberno en funcións e líder do PSOE, Pedro Sánchez. Redondo protagonizou diversos actos nos que criticou medidas como a aprobación da lei de memoria democrática, os pactos do PSOE con ERC e EH Bildu e a reforma dos delitos de sedición e malversación.