O presidente do TSXG aposta por unha xustiza áxil e reclama máis prazas xudiciais
Ignacio Picatoste abre o ano xudicial en Galicia con chamadas á modernización tecnolóxica
O fiscal superior alerta do aumento da ciberdelincuencia e do impacto dos incendios
Fernando Suanzes intervén na apertura do ano xudicial en Galicia. O presidente do TSXG, á dereita da imaxe. EFE/Cabalar
O presidente do Tribunal Superior de Xustiza de Galicia (TSXG), Ignacio Picatoste, inaugurou o ano xudicial en Galicia cunha aposta por unha xustiza máis áxil e próxima ás persoas, e insistiu na necesidade de aumentar as prazas xudiciais.
Picatoste subliñou a importancia de adoptar medidas ante os atrasos e advertiu de que os xulgados do Civil están nunha situación límite. “Non se pode pretender xudicializar cada disputa, non todo pode nin debe chegar aos tribunais”, dixo. Pediu dimensionar os cadros de persoal segundo a carga de traballo e avanzar na modernización tecnolóxica.
Defendeu tamén a transparencia, o diálogo e unha xustiza centrada nas persoas, na protección das vítimas e na coherencia. Lembrou que “a independencia xudicial non é un privilexio, senón unha garantía para a cidadanía”.
Balance da Fiscalía en Galicia
O fiscal superior de Galicia, Fernando Suanzes, agradeceu o labor dos 155 fiscais da comunidade e detallou que en 2024 emitiron 14.831 cualificacións, 694 escritos de alegacións en procesos de menores e múltiples cualificacións verbais en xuízos por delitos leves.
Indicou que os delitos incoados en Galicia medraron un 0,48 % interanual, cun aumento notable da ciberdelincuencia. Ademais, advertiu de que a vaga de incendios deste verán arrasou 111.000 hectáreas en Galicia e unhas 400.000 no conxunto do Estado, con oito vítimas mortais.
Suanzes sinalou que este curso xudicial estará marcado por cambios profundos, tanto lexislativos como pola irrupción da intelixencia artificial, que considerou unha oportunidade e tamén un desafío.
