O PP de Lugo rexistra a moción de censura
Os representantes do PP no consistorio lugués e a concelleira non adscrita María Reigosa, que fora na candidatura socialista, comparecen para explicar o pacto contra o Goberno bipartito lugués ás 14:15 horas
O alcalde, Miguel Fernández, ten previsto comparece ás 15:30 horas no concello
O Partido Popular rexistrou a moción de censura no Concello de Lugo, que presumiblemente derrubará o Goberno bipartito formado por socialistas e nacionalistas co apoio dos seus doce concelleiros e da edila non adscrita, María Reigosa, quen hai tan só unhas semanas formalizou a súa saída do grupo municipal do PSdeG.
Fontes do PP confirmaron que foi o viceportavoz do grupo municipal e portavoz na Deputación, Antonio Meijide, o encargado de presentar formalmente no rexistro municipal o documento coas trece firmas.
Rexistrada a moción de censura, a portavoz do grupo municipal do Partido Popular, Elena Candia, convocou a prensa para as 14:15 horas nun céntrico hotel da cidade, onde comparecerá acompañada pola propia María Reigosa, para explicar o pacto alcanzado para presentar a moción de censura para facerse co goberno da cidade.
O Partido Popular necesita o voto de María Reigosa, quen fora na lista do PSOE nas pasadas eleccións e que entrou en outubro na corporación local de Lugo, en substitución do falecido Pablo Permuy, e hai unhas semanas formalizou a súa saída do grupo municipal do Partido Socialista.
A tensión creceu nas últimas horas tanto no Consistorio como no ámbito político autonómico, aínda que os contactos se incrementaran desde hai días e dábase por feito que a iniciativa se presentaría nesta semana.
O PPdeG, con Alfonso Rueda e Paula Prado á fronte, deu luz verde a esta iniciativa co argumento de que os populares foron os máis votados e teñen "dereito" a gobernar.
Nesta mañá de mércores, a portavoz nacional do BNG, Ana Pontón, visitou o equipo municipal para mostrar o seu apoio ante a situación que se está vivindo.
A responsable nacionalista acusou directamente a Rueda de permitir "este atropelo democrático", e censurou a actitude de Elena Candia polo seu "afán desmedido de poder, utilizando a morte de tres concelleiros para facerse coa alcaldía".
