O PP recuperará a alcaldía de Ribeira tras un acordo con catro concelleiros do PBBI
A moción está asinada polos 10 edís do PP e catro dos cinco que os independentes teñen na corporación
A futura alcaldesa, Mariola Sampedro, celebra que a moción leve o selo dunha "ampla maioría de concelleiros" e deixa a un lado "calquera problema do pasado"
A alcaldía está en mans do nacionalista Luis Pérez Barral desde 2023 co apoio do PSOE e do PBBI
Ana Pontón amosa o seu apoio ao alcalde Luis Pérez Barral e di que "tras dous anos como rexedor, hoxe ten o apoio da maioría dos veciños"
O PP de Ribeira presentou unha moción de censura no consistorio da localidade coruñesa xunto a catro concelleiros do Partido Barbanza Independente (PBBI) que devolverá aos populares á Alcaldía, que desde os comicios municipais do 2023 estaba en mans do nacionalista Luis Pérez Barral co apoio do PSOE e do PBBI.
Amoción está asinada polos 10 edís do PP e catro dos cinco que os independentes teñen na corporación. O seu debate está previsto para o vindeiro 13 de outubro.
De prosperar, a nova alcaldesa da localidade do Barbanza será a popular Mariola Sampedro, que tomou a substitución de Manuel Ruiz Rivas, actualmente no Senado. Será a primeira muller en ocupar este cargo.
Deste xeito, rompe o tripartito xurdido tras as eleccións de maio de 2023 nas que un acordo entre o BNG, o Partido Barbanza Independente (PBBI) e o PSOE permitiu desbancar ao PP da alcaldía tras 32 anos de goberno.
A moción leva o selo "dunha ampla maioría de concelleiros"
A furutra alcaldesa en conferencia de prensa celebrou que esta moción leve o selo de "unha ampla maioría de concelleiros", deixando ao carón, dixo, "calquera problema do pasado".
"Somos dous grupos que estamos contentos de poder unirnos, de sumar e desde logo estamos preparados para asumir esa responsabilidade e ese reto do que significa gobernar unha cidade como Ribeira", manifestou.
Para Mariola Sampedro, esta moción chega contra un alcalde que "nunca asumiu a responsabilidade e a honra que supón gobernar Ribeira", ademais de faltar "aos principios do diálogo e o consenso". Tamén criticou que Pérez Barral fale de "a maioría do pobo" cando o BNG obtivo cinco concelleiros nas eleccións de 2023 fronte ás 10 dos populares.
Nesta liña, definiu como "totalmente natural" o pacto cos independentes, que tras os comicios de 2023 vetaran ao candidato popular Manuel Ruiz Rivas para un hipotético acordo co PP, que se quedou a un edil da maioría absoluta. Neste contexto, acusou ao BNG de "repartir carnés de maiorías" e de "lexitimidade".
Apoio de Ana Pontón ao alcalde
A líder do BNG mostrou este luns o seu apoio ao ata o de agora alcalde, Luis Pérez Barral.
“(Alfonso) Rueda non soporta que Ribeira teña un alcalde que goberna para a maioría, honesto e cun proxecto que mellora a vida da xente”, escribiu Pontón na súa conta na rede social X despois de que transcendese o rexistro da moción de censura.
A dirixente do Bloque enviou “apoio” ao rexedor e remarcou que “tras dous anos como alcalde, hoxe ten o apoio da maioría dos veciños. Adiante alcalde”.
