O pleno de Santiago aproba o pagamento a pequenos provedores, pero volve rexeitar as facturas de Viaqua

O pleno extraordinario do Concello de Santiago aprobou o pagamento das facturas pendentes a pequenos provedores, por un importe superior aos 366.500 euros.

Con todo, a corporación volveu rexeitar as facturas correspondentes a Viaqua, que ascenden a preto de 992.400 euros.

Trátase do cuarto pleno no que se debaten estes expedientes.

Nesta ocasión, as facturas puideron someterse a votación por separado.

BNG, Compostela Aberta e PSOE votaron a favor do pagamento das facturas de Viaqua. Os concelleiros non adscritos abstivéronse. O PP votou en contra, o que provocou o rexeitamento do punto.

No caso das facturas a pequenos provedores, Bloque, Compostela Aberta e socialistas volveron votar a favor. Os non adscritos e o PP abstivéronse, o que permitiu a aprobación do pagamento.

Reproches cruzados

O concelleiro de Facenda, Manuel César, destacou que o expediente incluía varios informes que resolven as dúbidas sobre a legalidade do pagamento.

Desde o grupo de non adscritos, Gonzalo Muíños criticou que o Goberno non separase antes as facturas.

Acusou o executivo local de priorizar o repartimento de responsabilidades fronte á resolución do problema.

Muíños cualificou a situación de espectáculo bochornoso pola falta de diálogo entre Goberno e oposición.

Xustificou a abstención do seu grupo pola obriga de pagar, pero tamén pola necesidade de contratar conforme á lei.  

A concelleira socialista Marta Abal defendeu facer todo o posible para que os provedores cobren.

Rexeitou normalizar o recoñecemento extraxudicial e apostou por regularizar as prestacións.

Pola súa banda, o concelleiro popular Borja Verea criticou a convocatoria do pleno extraordinario.

Defendeu o voto negativo do PP por coherencia fronte ás présas e o que cualificou de chantaxe.

Asegurou que, cos informes actuais, sería necesario verificar posibles irregularidades antes de pagar.

Dende o Goberno municipal, Manuel César replicou que os informes acreditan que os importes están dentro dos prezos de mercado.

Acusou ao PP de manipular o contido dos documentos con fins políticos.

A alcaldesa, Goretti Sanmartín, defendeu a actuación do goberno por responsabilidade coas empresas, os traballadores e a veciñanza.

Cualificou de erro que se defenda pagar unhas facturas e outras non.

Advertiu de que o Concello acabará pagando estas cantidades con xuros se non se desbloquea a situación.