O PPdeG aproba en solitario o teito de gasto da Xunta e encamiña os Orzamentos de 2026
O conselleiro de Facenda, Miguel Corgos, defendeu as contas realizadas pola Xunta para a elaboración dos orzamentos do próximo ano, que por primeira vez superan os 14.000 millóns de gasto non financeiro e cre que son prudentes que permitirán reducir o desemprego
Besteiro convida a Rueda a explicar no Parlamento cal é o seu modelo de financiamento e para o BNG o teito de gasto aprobado este luns é, en realidade, un recorte
O pleno do Parlamento de Galicia deu luz verde ao límite de gasto non financeiro da comunidade autónoma para 2026, que ascende a 14.177 millóns de euros, un 1,6 % máis que o orzamento do presente exercicio, co que a Xunta arrinca a preparación das contas do próximo ano.
O teito de gasto, aprobado o pasado venres pola Xunta, foi autorizado polo Parlamento só cos votos a favor do PPdeG, a abstención de Democracia Ourensana e o voto en contra tanto do BNG como do PSdeG.
O conselleiro de Facenda, Miguel Corgos, fixo fincapé na importancia de aprobar este límite de gasto porque abre o escenario para que a Administración autonómica poida "elaborar en prazo os orzamentos para o próximo ano" e "librar Galicia" da "inestabilidade" que afecta o resto de España e que tamén existe a nivel mundial.
Fronte a iso, a deputada do BNG Noa Presas considerou que a previsión do próximo ano é "insuficiente para manter recursos públicos" en tanto que esconde un "un recorte orzamentario", dado que o aumento do teito de gasto, dun 1,6 %, "nin sequera cobre" a subida da inflación, que se sitúa nun 2,7 %.
A parlamentaria nacionalista sinalou que esta é unha cuestión que se percibe mesmo desde o propio discurso do Goberno galego, que presentou o límite de gasto con "fogos de artificio", pero menores que en anos anteriores.
Presas alertou sobre as "consecuencias" que podería ter esta falta de recursos, que podería afectar negativamente a prestación de servizos públicos. "É un mal teito de gasto, que é un anticipo duns malos orzamentos", resolveu a deputada do Bloque.
Pola súa banda, o líder do PSdeG, José Ramón Gómez Besteiro, criticou que non fose o presidente da Xunta, Alfonso Rueda, o encargado de defender na Cámara a súa proposta de teito de gasto e tamén o seu posicionamento sobre o modelo de financiamento autonómico, tal e como lle pedían desde a oposición.
Os galegos, dixo, deberían saber se a Xunta ten un "proxecto de financiamento" que beneficie os cidadáns galegos ou unicamente busca a "confrontación con outros territorios, sobre todo con Cataluña".
Respecto á proposta do teito de gasto, o socialista restou valor ao límite que se pon a Xunta en tanto que, "como os pementos de Padrón, unhas veces cúmpreno e outras non" porque "xestionan mal".
O deputado do grupo mixto, pertencente a Democracia Ourensana, Armando Ojea, reprochou o pouco tempo do que dispuxeron os deputados para analizar o documento e acusou a Xunta de "querer facerlle unha ponte ao Lexislativo" ao unicamente darlles dous días para analizar a proposta.
Por último, o portavoz do PP no Parlamento, Alberto Pazos, reivindicou que a xestión da Xunta, que volve dar cumprimento ao seu compromiso "co rigor" e a "estabilidade" ao aprobar "en tempo e forma" o teito de gasto como antesala á aprobación das contas autonómicas, mentres o Goberno central continúa coas contas prorrogadas desde hai anos.
Denunciou que, a pesar da actuación do Goberno galego, a oposición continúe sendo "a máis apocalíptica, cinza e desnortada da historia" de Galicia.
