O Papa defende que a "solución dos dous Estados para Israel e Palestina é a única"
León XIV admitiu no voo que o levaba de Istambul a Beirut que "Israel aínda non acepta" esta proposta que apoia a Santa Sé
Milleiros de libaneses recibiron o pontífice nas rúas coas esperanzas postas na paz
O Papa lémbralle a Israel, á súa chegada ao Líbano, que "a solución dos dous Estados é a única". León XIV asegura que a Santa Sé apoia a proposta de dous Estados. Sabe que neste momento Israel non a acepta, pero vea como a única saída ao conflito con Palestina.
Así llelo dixo o pontífice aos xornalistas que viaxaban canda el no voo de Istambul a Beirut. Logo percorreu as rúas da capital libanesa aclamado por milleiros de persoas e pediulles aos seus cidadáns "ser construtores da paz".
O Líbano é o país de Oriente Próximo con máis porcentaxe de cristiáns, representan un 30% da súa poboación. O presidente lanzou ante León XIV unha mensaxe de pluralismo e unidade.
Entre os milleiros de libaneses que este domingo saíron ás rúas para darlle a benvida ao papa León XIV con bandeiras do Vaticano e do Líbano, moitos esperan que a súa visita se traduza na fin da violencia no país e que axude a abrir unha nova era de paz. A súa visita desenvólvese precisamente baixo o lema oficial "Benaventurados os que fan a paz" e prodúcese apenas tres días despois de que se cumprira un ano de cesamento do fogo con Israel, no medio dunha continuación dos ataques contra o Líbano e de mencións a este asunto entre os participantes.
Coa visita ao Líbano León XIV remata a súa primeira viaxe internacional, nun país sumido nunha crise económica e política. Un dos actos máis simbólicos será unha oración silenciosa no porto de Beirut, onde unha explosión que aínda esta baixo investigación xudicial, matou unhas 200 persoas en 2020 coas vítimas esixindo xustiza.
