O Ourense ficha o internacional bahameño Kentwan Smith

O Club Ourense Baloncesto anunciou a fichaxe do ala-pivote internacional bahameño Kentwan Smith, quen chega procedente do Anorthosis Famagusta de Chipre, equipo co que disputou a FIBA Europe Cup a pasada tempada.

“Smith chega a Ourense para reforzar a posición de interior, achegando experiencia, versatilidade e capacidade física. O xogador destaca pola súa mobilidade, lectura do xogo sen balón e presenza no rebote”, apuntou o club galego no seu comunicado.

Na competición continental, Smith disputou 8 encontros e mediou 14,1 puntos, 8,3 rebotes e 2 asistencias por partido, con máis de 18 créditos de valoración. Na liga regular de Chipre, Smith mediou 12,9 puntos, 7,3 rebotes, 2,2 asistencias e 1,1 tapóns nos 21 encontros disputados.

Formado na NCAA, o novo xogador do COB desenvolveu a súa carreira profesional en ligas de Europa como a romanesa, finlandesa, checa, eslovaca, danesa, sueca e chipriota.

O adestrador do Ourense, Moncho López, sinalou que Smith é “un xogador intelixente, con experiencia internacional que compite con intensidade e disciplina táctica, ideal en sistemas onde os interiores deben correr e abrir a cancha”.