O Obradoiro paga o despiste ao final do segundo cuarto e perde en Gran Canaria
Recibiu un parcial de 13-2 cando dominaba o encontro e xa non volveu a estar por diante
O equipo local gañou o partido por 75-68
O Obradoiro perdeu na pista do Gran Canaria por 75-68. O encontro, igualado, tivo o seu punto de inflexión nos últimos minutos do segundo cuarto.
Dominou o Obradoiro o treito inicial e cun Zurbriggen moi atinado colleu vantaxe no primeiro cuarto (15-17). No segundo, o partido ía sobre rodas ata o minuto 15 (26-30), pero un parcial de 13-2 ata o descanso deulle unha vantaxe a Gran Canaria que xa non soltaría (39-32 no intermedio).
No terceiro cuarto, o Obradoiro mantívose no partido e mesmo chegou a poñerse por diante cunha tripla de Robertson (49-50). A igualdade foi máxima, pero o Gran Canaria colleu ao principio do último cuarto unha marxe de cinco puntos que xa non soltaría ata o final.
