O home máis lonxevo do mundo cumpre 113 anos en Venezuela cunha saúde excelente
Juan Vicente Pérez, agricultor, recibiu o recoñecemento do Guinness tras o falecemento do español que tiña a marca
O seu segredo inclúe o traballo duro, noites de descanso e "beber un vaso de augardente todos os días"
Aos seus 113 anos, os ollos de Juan Vicente Pérez xa o viron todo. Na actualidade é o home máis lonxevo do mundo. O seu médico asegura que goza dunha saúde excelente.
A súa enorme descendencia, con 11 fillos, 41 netos, 18 bisnetos e 12 tataranetos, compensa a falta da súa muller, xa falecida. Pérez naceu o 27 de maio de 1909 e o 17 de maio o Guinness xa o recoñeceu como o home máis vello do mundo.
Oriundo da cidade de El Cobre, no estado venezolano de Táchira, ten ademais de saúde unha memoria excepcional, din os seus achegados. Lembra a súa infancia, o seu matrimonio, o nome dos seus irmáns, fillos e netos.
Era o noveno de dez irmáns. Presenciou dúas guerras mundiais e inventos como o televisor ou a chegada de Internet e a pandemia actual da covid.
Comezou a traballar aos cinco anos na agricultura axudando aos pais nas colleitas do café e o azucre. De adulto exerceu como alguacil e resolvía as disputas polas terras na localidade onde residía, Caricuena.
No seu 113 aniversario acompañouno toda a pompa venezolana coa relixiosidade propia e a cultura. Houbo unha liturxia coa participación de autoridades e veciños do home. Popularmente coñéceno como tío Juan e saíu da residencia onde permanece ata a igrexa próxima para participar nos oficios relixiosos.
