O grande incendio do norte de Portugal cede tras afectar 21 vivendas

O grande incendio forestal declarado o martes no municipio portugués de Valpaços, a poucos quilómetros da fronteira con Galicia, evolucionou favorablemente durante a madrugada deste xoves. Os equipos de extinción conseguiron consolidar o 70 % do perímetro e traballan para estabilizar o lume nas próximas horas. 

No operativo participan 793 efectivos e 250 vehículos, aos que se incorporarán os medios aéreos ao longo da xornada. A situación máis complicada concéntrase na parroquia de Santa Valha, onde continúan varios focos dispersos e preocupa a evolución do vento e o aumento das temperaturas. 

Danos en 21 vivendas 

O incendio causou danos en, polo menos, 21 vivendas, oito delas habitadas ou de segunda residencia, ademais dun almacén agrícola e dous talleres de despezamento de vehículos. Tamén resultaron feridos leves tres bombeiros, un axente da Garda Nacional Republicana e un civil. 

As persoas desaloxadas preventivamente en varias aldeas de Mirandela xa puideron regresar ás súas casas durante a noite. Mentres, os incendios e de Guarda e Deilão, tamén próximos á fronteira española, permanecen controlados ou baixo vixilancia.