Ascenden a 34 os mortos polo terremoto de magnitude 7,1 no Xapón
As numerosas réplicas, incluído un sismo de magnitude 5,8 o mércores á noite, levan as autoridades a alertar da posibilidade de que ocorra un tremor maior nos próximos días
Reuters
As autoridades da prefectura xaponesa de Kumamoto elevaron este xoves a 34 as vítimas mortais por mor do terremoto de magnitude 7,1 que sacudiu o suroeste do Xapón o pasado martes, mentres continúan os labores de rescate de posibles sobreviventes.
O centro de resposta ante desastres da prefectura precisou que neste balance se inclúen sete falecidos no centro comercial Aeon Mall da localidade de Kashima, que rexistrou unha explosión despois do sismo, así como outros oito polo derrube dunha cheminea da fábrica de Nippon Paper Industries en Yatsushiro.
A pesar deste novo balance das autoridades locais, o portavoz do Goberno central, Minoru Kihara, mantivo en 30 o número de falecidos nunha conferencia de prensa practicamente simultánea, apoiándose na información proporcionada pola policía.
Máis de 48 horas despois do tremor, as operacións de procura e rescate de sobreviventes continúan, no medio de cortes de auga e electricidade, e os prognósticos de altas temperaturas na rexión.
Neste contexto, o Ministerio de Defensa informou de que na noite deste mércores se iniciaron os labores de procura con cans.
Durante a xornada, unhas 10.000 persoas seguían evacuadas nuns 400 centros, onde o Goberno local e as Forzas de Autodefensa (exército) están a colaborar na instalación de unidades de aire acondicionado.
O terremoto rexistrouse ás 09:27 (hora galega) do martes, e o seu epicentro situouse a uns dez quilómetros de profundidade baixo a prefectura de Kumamoto, segundo a axencia meteorolóxica xaponesa, que emitiu unha breve alerta de tsunami.
O tremor alcanzou o máximo na escala xaponesa de 7 niveis, centrada en medir a axitación sobre a superficie e o potencial destrutivo dos tremores, e causou importantes danos materiais, que inclúen o derrubo de parte do muro do popular castelo de Kumamoto.
Desde entón rexistráronse centenares de réplicas, incluído un sismo de magnitude 5,8 o mércores á noite, e as autoridades alertaron da posibilidade de que ocorra un tremor maior nos próximos días.
