O delegado do Goberno en Ceuta pide ser substituído no cargo

O delegado do Goberno en Ceuta, Miguel Ángel Pérez Triano, comunicou o seu desexo de non continuar no cargo cando fai dous meses da entrada masiva de migrantes na cidade autónoma.

Fontes de Moncloa confirmaron que o Goberno está a ultimar a substitución do máximo representante do Executivo central en Ceuta, tras decidir hai uns días non seguir neste posto.

Segundo estas fontes, trátase dunha decisión "humana e persoal despois de moitas semanas de inmenso traballo". A crise producida a finais de xullo así como as posteriores acusacións, sobre todo por parte do Goberno ceutí, de que non alertou sobre o que se podía prever marcaron a última etapa de Pérez Triano a cargo do ente gobernativo.

A principal polémica produciuse con motivo dunha conversación co seu xefe de Gabinete, Gonzalo Sanz, en relación a unha mensaxe do CNI sobre unha alerta pola situación da fronteira.

Pérez Triano argumentou que descoñecía esta mensaxe o que posteriormente provocou a dimisión do posto de Gonzalo Sanz, quen mantiña que o trasladara ao delegado do Goberno.

O propio Pérez Triano compareceu publicamente para deixar claro que descoñecía estas mensaxes e que o único que trasladou a Madrid é que a presión migratoria estaba a aumentar de forma considerable no perímetro fronteirizo, sobre todo as entradas a nado, e dixo que o día antes da entrada masiva accederan á cidade 500 migrantes por este método.

O actual delegado do Goberno era secretario xeral do PSOE de Ceuta e tomou posesión do cargo no mes de febreiro deste mesmo ano substituíndo a Cristina Pérez. Miguel Ángel Pérez (Ceuta, 1983) é mestre de Educación Primaria, Infantil e Educación Física, graduado en Pedagoxía e funcionario do Corpo de Mestres desde 2014.

Foi profesor para estranxeiros de Cruz Roja no Centro de Estancia Temporal de Inmigrantes (CETI) e entre os anos 2019 e 2021 dirixiu a Oficina Única de Estranxeiría de Ceuta.

Esta semana, a xuíza da Audiencia Nacional María Tardón tomará declaración como testemuña ao antigo xefe de gabinete do delegado do Goberno Gonzalo Sanz e ao presidente da Cidade Autónoma Juan Jesús Vivas no marco da investigación aberta sobre estes feitos.