O Goberno non prevé o traspaso da AP-9 a Galicia tras as bonificacións
Di que "non ten encaixe" un cambio de titularidade
Remarcou que as bonificacións históricas supoñen un esforzo a cargo dos Orzamentos Xerais do Estado
A ministra de Transportes descarta polo momento o traspaso da AP-9 a Galicia. Di que non é compatible coas bonificacións que o Goberno aprobou hai uns meses para a autoestrada.
"É o ministerio quen paga esas bonificacións e polo tanto parece que ten difícil encaixe transferir a titularidade da autoestrada a Galicia con ese marco de bonificacións que asume o Goberno central", di a ministra Raquel Sánchez.
Remarcou que esas bonificacións históricas supoñen un esforzo moi importante a cargo dos Orzamentos Xerais do Estado e lembrou que outros gobernos prorrogaron concesións a autoestradas que “non estaban xustificadas” e que xeraron, dixo, "impactos negativos".
“O que estamos intentando facer, na medida en que temos posibilidades e na medida en que vaian chegando os prazos de finalización de concesión das autoestradas, é recuperalas, pero naquelas que non podemos recuperar, procedemos a aplicar as bonificacións”, declarou tamén a Ministra de Transportes.
Sobre o futuro modelo de financiamento destas vías, sinalou que o obxectivo final do ministerio é aplicar unha boa política de modelo de tarificación da rede viaria e tamén tentar corrixir eses desaxustes que se produciron polas prórrogas das concesións.
