Comeza o desaloxo e traslado dos migrantes que dormen na praia en Ceuta

O Goberno habilitou temporalmente varios espazos para a acollida de 1.800 persoas migrantes que se atopan en situación de rúa na praia do Trampolín e na zona de Loma Colmenar, en Ceuta, que prevé ampliar progresivamente.

O traslado a estas instalacións está a realizarse desde primeiras horas deste xoves de xeito voluntario no marco dun dispositivo coordinado coas Forzas e Corpos de Seguridade do Estado e o Goberno de Ceuta, segundo fontes do Ministerio de Inclusión, Seguridade Social e Migracións.

O operativo comezou ás 7:00 e, polo momento, está a transcorrer sen incidentes , e consiste incialmente en que as persoas que están na praia recollan as súas pertenzas e se concentren para facilitar o traslado progresivo e ordenado. 

O dispositivo está acompañado por un amplo despregamento de Policía Nacional, Guardia Civil e Policía Local, que está a provocar importantes dificultades para a circulación de vehículos nos arredores.

Fontes policiais estiman que na praia poderían atoparse entre 3.500 e 5.000 persoas, unha cifra que toma como referencia, entre outros datos, os ao redor de 3.500 menús distribuídos este mércores. O traslado comezará cando se consegua agrupar ás primeiras 1.000 persoas.

As fontes informaron da habilitación temporal dos espazos de Loma Margarita e El Embolsamiento, que serán ampliados progresivamente conforme finalicen os traballos de adecuación dos demais emprazamentos previstos.

O obxectivo prioritario desta actuación é "dar resposta á situación das persoas que se atopaban en situación de rúa na zona da praia do Trampolín e a Loma Colmenar", ofrecéndolles unha alternativa de aloxamento e acollida que permita que non teñan que seguir pernoitando na vía pública ou na propia praia.

O Executivo ofrece así a posibilidade de acceder a estes espazos de acollida "nunhas condicións adecuadas e seguras" no marco dun dispositivo cuxo obxectivo é "garantir que o despregamento dos recursos e o traslado das persoas se realicen de xeito ordenado e seguro", engaden as fontes.

Esta actuación forma parte do dispositivo extraordinario posto en marcha polo Goberno, en colaboración con entidades do terceiro sector, como Engloba ou ACCEM, para reforzar a capacidade de acollida en Ceuta e dar unha resposta adecuada ás necesidades derivadas da situación excepcional que atravesa a cidade autónoma.

Hai uns días a ministra de Inclusión, Seguridade Social e Migracións, Elma Saiz non descartou que se ampliasen a 4.000 as novas prazas que se poderían habilitar coa instalación de catro novos dispositivos de atención humanitaria en Ceuta, cuxos traballos xa comezaron.