O Goberno activará en xuño axudas para a convocatoria de baterías do PERTE VEC

A vicepresidenta primeira e ministra de Asuntos Económicos e Transformación Dixital, Nadia Calviño, avanzou este venres que no mes de xuño o Goberno porá en marcha a segunda parte das axudas relacionadas con baterías da nova convocatoria do Proxecto Estratéxico para a Recuperación e Transformación Económica no sector do Vehículo Eléctrico e Conectado (PERTE VEC).

Anuncio que se coñece despois de que este xoves a Comisión Europea aprobara as axudas para a fabricación de baterías para vehículos eléctricos e conectados. Nunha visita a Galicia, a ministra de Asuntos Económicos tamén dixo que espera que se presente Stellantis, xa que “o compromiso do Goberno de España con esta empresa é "total".

“Imos lanzar a segunda parte da convocatoria en xuño e agardo que Stellantis se presente para que, ademais dos 15 millóns de euros que xa se investiron, poidan seguir desenvolvendo os seus investimentos en España", sentenciou Nadia Calviño.