O fiscal ve acreditado que Fernández Díaz tivo control e manexo no operativo Kitchen
César de Rivas sostén que a Kitchen non perseguía o diñeiro de Luis Bárcenas, senón "obter documentación "comprometedora" para o PP e "boicotear" a investigación xudicial do caso Gürtel
O xuízo continuará este xoves cos informes finais doutras acusacións
Ao longo de máis de catro horas, o fiscal César de Rivas retratou a operación Kitchen como un operativo parapolicial ilegal "concibido" pola cúpula do Ministerio do Interior do primeiro Goberno de Mariano Rajoy coa finalidade "bastarda" de achar documentación en poder do extesoureiro Luis Bárcenas que puidese resultar incriminatoria para o PP.
De Rivas considera acreditado que o exministro do Interior Jorge Fernández Díaz participou no "operativo parapolicial delituoso" contra Luis Bárcenas coñecido como Kitchen e tivo "control e manexo" do chofer do extesoureiro do PP, que actuou como confidente.
O fiscal, que pide unha condena de 15 anos de cárcere para este exministro do primeiro goberno de Mariano Rajoy, defendeu ante o tribunal da Audiencia Nacional que a finalidade de Kitchen foi "bastarda" e "delituosa": non perseguía o diñeiro do extesoureiro, senón "obter documentación "comprometedora" para o PP e os seus máximos dirixentes e "boicotear" a investigación xudicial do caso Gürtel.
"Acreditouse no plenario a participación, xa desde o momento da captación de Sergio Ríos -chofer de Bárcenas- tanto de Francisco Martínez, secretario de Estado, como de Jorge Fernández Díaz, na súa condición de ministro do Interior", recalcou o fiscal, aludindo a mensaxes incriminatorias rexistradas ante notario polo exnúmero dous de Interior.
A través das axendas do excomisario José Manuel Villarejo, para quen pide 19 anos de cárcere, o fiscal ve acreditado o interese que os acusados tiñan desde principios de 2013 en documentación comprometedora en poder de Bárcenas "incluíndo as gravacións que polo menos suxería" o extesoureuro que tiña con dirixentes do partido do PP, en concreto co entón presidente do Gobierno Mariano Rajoy e co dirixente do PP Javier Arenas.
A Villarejo pídelle a pena máis alta porque lle atribúe un proxecto paralelo para buscar a nulidade do caso Gürtel.
O fiscal destacou as mensaxes atribuídas ao exministro que Francisco Martínez protocolizou ante notario e que resultaban "incriminatorias" para o exministro, polas que durante a vista oral non lle preguntou o seu letrado.
Nunha mensaxe en xullo de 2013, Fernández Díaz escribiu "chofer B Sergio Ríos Esgueva agora fai esa función coa súa muller", en agosto apuntou a un contacto que ía conseguir e recalcaba "hai que conseguir esa info" e nunha terceira mensaxe, en outubro, no que aludía ao envorcado de dispositivos e a un informador que dicía que "ese material dérao B aos avogados" para preparar a súa defensa.
Ademais, o fiscal apuntou de novo a anotacións de Villarejo, que na súa axenda "non se enganaba a si mesmo" en relación ao exdirector adxunto operativo da Policía, Eugenio Pino, e o seu interese en "algunha novidade do cociñeiro para dicirllo ao número 1", que considera unha referencia ao exministro Fernández Díaz.
Tamén son múltiples as anotacións e gravacións relacionadas co secretario de Estado, a quen Villarejo alcumaba "Chisco".
Un a un foi repasando os elementos que apuntan á participación das sete persoas as que acusa.
Por iso, segundo o fiscal, o exministro e o seu número dous, que ocupaban "a máxima posición de xerarquía no Ministerio de Interior" controlaban de "xeito indirecto" o chofer "a través das contas que lles rendían os controladores directos": os comisarios José Manuel Villarejo e Enrique García Castaño e o inspector Andrés Gómez Gordo, alcumado Cospedín, e que era ao comezo do dispositivo asesor de María Dolores de Cospedal en Castela-A Mancha. Tamén lles informaba o entón DAO Eugenio Pino.
O fiscal subliñou ademais que os acusados cometeron malversación porque se empregaron fondos reservados para remunerar ao chofer con 2.000 euros ao mes, a pesar de que o dispositivo era ilícito. Sergio Ríos despois obtivo un posto como Policía Nacional.
"O operativo foi concibido na mesma cúpula do Ministerio do Interior. Hai que ter en conta o posto que todos e cada un dos acusados ocupaba", recalcou.
Un operativo sen control xudicial
O fiscal incidiu en que o dispositivo de Kitchen, que incluíu vixilancias á muller de Bárcenas, a entrada nun local ou o envorcado de dispositivos, non buscaba o diñeiro nin foi unha operación de intelixencia, senón un operativo delituoso que non se comunicou ao maxistrado instrutor de Gürtel nin á UDEF, que entón investigaba o caso.
En múltiples ocasións reiterou que a meta era que a información comprometedora do PP non acabase no xuíz que investigaba Gürtel, o que constituiría un delito de encubrimento en que sería irrelevante se "os acusados conseguiron ou non o seu propósito" de substraer probas.
Destacou ademais como de xeito "errático" e contradicíndose uns os outros os acusados trataron de "legalizar a súa actuación buscando diferentes finalidades ao operativo", e falaron por exemplo de localizar contas en Suíza cando esta información xa obraba antes do dispositivo en poder da UDEF.
Por estes feitos, o fiscal pide 15 anos de cárcere para o exministro, o exsecretario de Estado, o exDao e o inspector Gómez Gordo, mentres que para Villarejo solicita 19 anos de prisión, para o exchófer 12 anos e medio e para o ex xefe de Asuntos Internos Marcelino Martín Blas dous anos e medio.
O xuízo continuará este xoves cos informes finais doutras acusacións.
