O canteirán Noé Carrillo mete o Depor nos oitavos de final da Copa do Rei (1-0)

O deportivo estará no bombo dos oitavos de final da Copa do Rei tras derrotar ó Mallorca por un tanto a cero. E cun inesperado protagonista, o canteirán Noé Carrillo, que debutaba co primeiro equipo e que conseguiu o tanto da clasificación aproveitando á perfección os dez minutos dos que dispuxo.

Na primeira metade o peso do partido levouno o equipo balear. Cunha disposición máis ofensiva do habitual, con Pablo Torre no medio centro e catro xogadores por diante, os de Arrasate chegaron con perigo á área de herculina. O xaponés Asano errou na definición en dúas oportunidades e Javi Llabrés tivo a máis clara dese período cun duro disparo desde a frontal da área que mandou a saque de esquina Eric Puerto. O Deportivo buscaba facer dano á contra e soamente as incursións do italiano Quagliatta crearon certa inquedanza no cadro bermellón.

No inicio da segunda metade o Depor viviu o seu mellor momento. Villares estrelaría un balón no pau da meta de Bergstrom e acto seguido Mulattieri non atinaba coa portería nun  remate de cabeza realizado a centro de Quagliatta. Pero pouco a pouco o Mallorca volveuse a facer co dominio do partido o que provocou que movera ficha Antonio Hidalgo. Mario Soriano, Luismi Cruz, Stoichkov e Nsogo entraron no terreo de xogo para reactivar o ataque local. E cos trocos chegaría o minuto de tolemia do partido. Maffeo remataba ó traveseiro e o rexeite provocaba unha contra que remataba noutro remate que se topou co traveseiro pero esta vez do canteirán deportivista Nsogo. E sería outro canteirán o que se convertería no heroe da noite. Noé Carrillo,que acababa de entrar no terreo de xogo sustituíndo a Diego Villares, aproveitaríase dun novo rexeite do pau a unha cachoalada de Nsogo,  para conseguir o gol que daría a clasificación ó Depor para os oitavos de final da Copa do Rei.