O CXPX recomenda que só se poida cambiar de sexo sen aval xudicial a partir dos 18 anos

O órgano de goberno dos xuíces aprobou este mércores, con catro votos en contra, unha emenda que endurece a proposta dos tres relatores que elaboraron o borrador do ditame sobre o anteproxecto.

A norma deseñada polo Ministerio de Igualdade abre a porta ao cambio de sexo no rexistro sen necesidade de informes médicos a partir dos 12 anos. Entre 12 e 14 anos necesitarase aprobación xudicial; entre 14 e 16, a asistencia de pais ou titores; e a partir dos 16 non haberá limitación algunha.

No seu borrador do pasado 8 de abril, o CXPX consideraba que non se protexía suficientemente os adolescentes de entre 14 e 16 anos e subliñaba que debía primar o interese superior do menor. Por iso propoñía que neses casos un xuíz comprobase que teñen "suficiente madurez" e "estabilidade na situación de transexualidade", do mesmo xeito que se propón cos nenos de 12 a 14 anos.

Agora, coa emenda aprobada polo pleno, o CXPX eleva ata os 18 anos esta condición.

• O CXPX  tamén advirte sobre determinados aspectos que poderían vulnerar dereitos das mulleres,

Aínda que ve loable a finalidade da lei, que é evitar a discriminación dos colectivos trans e LGTBI, inclúe diversas consideracións que advirten de que, se non se precisa, as mulleres poderían saír prexudicadas en certos ámbitos como o deportivo ou nas probas físicas para acceder a determinadas profesións.

O CXPX pide garantías para evitar situacións fraudulentas e que ninguén cambie de sexo para eludir responsabilidades fronte a vítimas de violencia de xénero. Considera, ademais, que a reversión dun cambio de sexo rexistral debería ter carácter "absolutamente excepcional", "sempre baixo decisión xudicial e nunca de forma incondicionada nin ilimitada".

Por outra banda, o pleno manifestou a súa desconformidade coa prohibición de terapias de conversión que recolle o anteproxecto e considera que non cabe a prohibición naquelas situacións en que se conta co consentimento do afectado.

"Imos esperar a ter ese informe do CXPX e, como facemos sempre desde o Goberno, todas as achegas construtivas serán tidas en conta", sinalou a ministra de Igualdade, Irene Montero.

A ministra destacou que as persoas trans merecen que as institucións garantan todos os seus dereitos e non que os cuestionen e asegurou que é consciente da súa responsabilidade como Goberno para "blindar e garantir" todos os dereitos das persoas trans e lgtbi.

Lembrou que o CXPX sempre se opuxo ás leis feministas e mencionou a súa posición sobre a lei do matrimonio igualitario, que dixeron que era como casar unha persoa cun animal, ou a lei de violencia de xénero, da que chegaron a expor dúbidas sobre a súa constitucionalidade.

As organizacións que representan o colectivo trans pediron ao Goberno que "desatenda" este informe que, lembran, "chega tarde".

Cren ademais que o informe se aliña cos sectores antidereitos trans que nos últimos dous anos exerceron "unha violencia brutal sobre o colectivo". Destacan que o CXPX responde a unha maioría conservadora e leva máis de tres anos caducado e lembran que non é a primeira vez que se mostra contrario ao avance de dereitos sociais e civís.