O Constitucional corrixe o Supremo e confirma a absolución do procesado polo crime da viúva da CAM

O Tribunal Constitucional anulou a decisión do Supremo de revogar a absolución de Miguel López polo asasinato de María del Carmen Martínez, viúva do expresidente da extinta Caixa do Mediterráneo (CAM) Vicente Sala, o 9 de decembro de 2016 nun concesionario de coches de Alacante.

A Audiencia de Alacante absolveu a López dun delito de asasinato e outro de tenza ilícita de armas, polo que se lle pedían 24 anos de cárcere, tras o veredicto do xurado popular que o declarou "non culpable" do crime, porque ninguén o viu e por falta de probas de que fose a persoa que efectuase os disparos, un fallo que ratificou o Tribunal Superior da Comunitat Valenciana.

Máis tarde, o Supremo anulou a absolución e ordenou celebrar un novo xuízo ao entender que se vulnerou o dereito á tutela xudicial da acusación particular, que exerce un fillo da falecida, ao constatar dúas infraccións procedementais que xeraron indefensión no acusado.

Referíase á audiencia celebrada pola maxistrada-presidenta na que comunicou a devolución dun primeiro veredicto aos membros do xurado porque non valoraran as probas da defensa, así como a posterior destrución da acta do mesmo.

Pero agora o Constitucional considera que se vulnerou o dereito á tutela xudicial efectiva de Miguel López, xa que a argumentación do alto tribunal utilizada para concluír que aquelas anomalías xeraran unha indefensión á acusación particular non resulta respectuosa coa xurisprudencia constitucional.

Esta xurisprudencia determina que para anular unha absolución e acordar un novo xuízo ao apreciar indefensión, é preciso que esa situación non se deba á pasividade dos profesionais que a representen.

E aquí o Constitucional destaca que esa indefensión que o Supremo di xerada á acusación particular foi consecuencia da súa propia conduta, por non reaccionar no momento procesualmente adecuado ante o que consideraba que eran infraccións procesuais da lei do Xurado.

Na devandita audiencia a acusación tomou a palabra, pero nada alegou nin en relación con que a audiencia estivese a desenvolverse en presenza dos membros do xurado nin respecto de que non se facilitou previamente o acceso á acta que se pretendía devolver.

Por iso, a corte de garantías anula a sentenza do Supremo e declara firme a absolución. A sentenza conta co voto particular dos maxistrados Ricardo Enríquez e José María Macías.