O Congreso reproba e pide o cesamento de Ana Redondo pola xestión das pulseiras antimaltrato
A moción, presentada polo Partido Popular, saíu adiante grazas á abstención dalgúns dos socios do Goberno como ERC, Junts ou BNG
O presidente do Goberno di, desde Nova York, que a ministra conta con "todo o seu apoio e solidariedade"
O PP acusa o Goberno de "abandonar" as mulleres e Montero cúlpao de "crear unha alerta social"
O Congreso dos Deputados reprobou á ministra de Igualdade, Ana Redondo, e esixiu o seu cesamento inmediato pola xestión das pulseiras de control telemático de agresores machistas.
Os populares conseguiron os apoios necesarios para sacar adiante a moción mediante a cal a Cámara Baixa reproba a Redondo por "a súa neglixente xestión á fronte do Ministerio" e esixe ao presidente do Goberno, Pedro Sánchez, o seu "cesamento inmediato" debido aos "graves fallos no sistema Cometa encargado das pulseiras antimaltrato".
A iniciativa tamén solicita que se ofreza información urxente sobre as circunstancias nas que se produciron eses fallos e sobre as medidas adoptadas para liquidar os "graves prexuízos causados ás vítimas afectadas".
Na moción tamén se pide actualizar os datos sobre excarceracións e reducións de condena de agresores sexuais como consecuencia da entrada en vigor da lei do só si é si.
PP, Vox e UPN votaron a favor, mentres que algúns socios do bloque de investidura, ERC, Junts, BNG e Coalición Canaria, abstivéronse. Os votos favorables foron 170, fronte a 162 en contra.
Xunto ao bloque de PSOE e Sumar, contrarios á reprobación, mantivéronse Podemos, EH Bildu e o PNV.
"Apoio total" do presidente do Goberno tras a reprobación
O presidente do Goberno expresou o seu total apoio e solidariedade á ministra de Igualdade, despois de ser reprobada polo Congreso pola xestión das pulseiras de control telemático de agresores machistas, e garantiu que ese sistema funciona e "mellor que antes".
Sánchez referiuse a esa reprobación en conferencia de prensa en Nova York na que quixo deixar claro que o sistema polo que foi cuestionada funciona. "E funciona mellor que o que funcionaba antes", dixo, antes de recalcar que iso é moi importante para as mulleres que sofren malos tratos.
Recoñeceu incidencias técnicas, pero fixo fincapé en que a propia Fiscalía recoñeceu que as vítimas estiveron protexidas "24 horas 7 días á semana". Por iso dixo que non vai admitir leccións de quen nega a violencia machista e de quen pacta con eles.
