O Celta despide a temporada cunha festa pola permanencia en Balaídos

Mañá remata a temporada do Centenario do Celta. Faino en Balaídos, e coa tranquilidade do deber cumprido a semana pasada. O equipo vigués festexará a permanencia cunha festa antes do partido, que comeza ás catro e cuarto contra o Valencia.

No campo haberá en xogo a posibilidade de rematar a Liga no décimo terceiro posto, o que sería o mellor da temporada. O artífice deste bo remate, Claudio Giráldez, libera a Damián e Hugo Álvarez para que reforcen o Fortuna no playoff. O técnico, que convocou a Yoel e Javi Rueda, valora así a súa experiencia en primeira. "Foi mellor do agardado, todo moi sinxelo, no vestiario e en todos os aspectos. Estamos preparados para cando veñan mal dadas. Agardamos poder quedar moitos anos nesta categoría".