O Celta B gáñalle ao Badaxoz e apunta a Riazor (2-0)
Raúl Blanco e Miguel Rodríguez marcaron os tantos vigueses no primeiro tempo
Miguel non xogará contra o Deportivo por sanción
Os números do Celta B asustan. Leva 32 dos últimos 39 puntos e a vindeira semana podería adiantar na clasificación ao Deportivo. Contra o Badaxoz volveu a dar mostras do seu poderío. Sen facer un gran encontro gañou cunha insultante superioridade.
Só ían catro minutos de partido cando Raúl Blanco marcou cun remate cruzado. Faltaban Iker Losada e Lautaro pero Raúl supliunos dun xeito sensacional. Antes da media hora Miguel Rodríguez moveuse por detrás da defensa e cruzou diante do porteiro pacense. O partido estaba resolto.
O control dos de Claudio foi total. Case non concederon oportunidades ao equipo contrario e non xeraron máis perigo porque non o precisaban. A única nova negativa foi o cartón que viu Miguel Rodríguez, o quinto da súa conta co que non xogará en Riazor.