O BNG di que a mensaxe de Rogelio Santos a Paula Prado "non ten nada que ver" coa formación

A viceportavoz primeira do BNG no Parlamento, Olalla Rodil, asegurou este luns que a súa formación “non ten nada que ver” nin apoia a mensaxe que Rogelio Santos Queiruga, número 4 na lista do BNG nas eleccións europeas de 2024, lanzou contra a número dous do PPdeG, Paula Prado.

Na xornada do domingo, a secretaría xeral dos populares galegos denunciou un ataque nas redes sociais por parte de Rogelio Santos, en que este chega a dicir que lle fai falta unha bomba -mediante unha emoticona- na súa zona íntima.

Cuestionada respecto diso, a viceportavoz do BNG lembrou que esta mensaxe foi escrita na “conta persoal” de Santos e aclarou que “non representa en absoluto” a formación nacionalista.

Así, Rodil fixo un “chamamento xenérico a que todos baixemos un pouco o ton na forma de expresarnos e de dirixirnos aos demais” tanto nas redes sociais como nas intervencións nas institucións.

“Nunca o ruído pode quedar por encima dos argumentos”, sentenciou Rodil.

Denuncias da Consellería de Política Social

Cuestionada tamén pola denuncia da conselleira de Política Social e Igualdade, Fabiola García, que a pasada semana asegurou sentirse “perseguida, acosada e sinalada” polo sindicato nacionalista CIG, Rodil insistiu en que no BNG rexeitan “calquera ataque persoal que atente contra calquera persoa”.

Con todo, dixo que non se pode “tentar utilizar” este tipo de argumentos para “tapar” a mala xestión do departamento de Política Social.

Lamentou así que se tente “criminalizar as traballadoras” para non falar das “condicións de precariedade” que padecen as mulleres que exercen en residencias de maiores, centros de día privados ou no servizo de axuda no fogar (SAF) de asistencia a domicilio a persoas con dificultades de mobilidade.