O BCE sobe os tipos de xuro un cuarto de punto, ata o 4,25 %

O Banco Central Europeo (BCE) decidiu este xoves subir os seus tipos de xuro nun cuarto de punto porcentual, ata o 4,25 %, porque a inflación segue demasiado elevada.

Tras a reunión do Consello de Goberno, o BCE informou de que tamén incrementa en 25 puntos básicos a facilidade de crédito, a que presta aos bancos a un día, ata o 4,50 %, e a facilidade de depósito, a que remunera o exceso de reservas a un día, ata o 3,75 %, con efectos a partir do 2 de agosto de 2023.

A presidenta do BCE, Christine Lagarde, explicou en conferencia de prensa que "as perspectivas económicas a curto prazo para a zona do euro deterioráronse debido principalmente a unha demanda interna máis débil".

"A elevada inflación e unhas condicións de financiamento máis duras reducen o gasto. Isto lastra especialmente a produción manufactureira, que se retén pola débil demanda externa", indicou.

A entidade monetaria prevé que "a inflación continúe descendendo durante o resto do ano, pero manterase por riba do obxectivo durante un período prolongado" e observa que aínda que "algúns indicadores mostran signos de moderación, a inflación subxacente mantense en niveis, en xeral, elevados".

O BCE considera que as anteriores subidas dos tipos de xuro seguen transmitíndose con forza e chegan á economía porque endebedarse é máis caro e máis difícil xa que as condicións de financiamento volveron a endurecerse e frean cada vez máis a demanda, o que é un factor importante para que a inflación volva ao obxectivo.

O Consello de Goberno tomará as súas próximas decisións sobre os tipos de xuro segundo sexan os datos "das perspectivas de inflación tendo en conta os novos datos económicos e financeiros, a dinámica da inflación subxacente e a intensidade da transmisión da política monetaria", engade o BCE nun comunicado.

Así, o prezo do diñeiro máis alto en 16 anos, tras un ano enteiro de subas.