O autor do tiroteo en Suecia xa falecera cando a policía entrou no centro educativo para adultos

O suposto autor do tiroteo ocorrido nun centro educativo para adultos en Örebro, ao oeste de Estocolmo, no que hai once mortos e seis feridos, xa falecera cando a policía o atopou na escola, informaron este mércores as autoridades suecas.

"Ao chegar a policía ao lugar escoitáronse disparos. Cando se atopou o sospeitoso, esa persoa xa estaba morta. Non podemos confirmar que o tirador se disparase, pero todo apunta a que si", dixo en conferencia de prensa o xefe da policía de Örebro, Roberto Eid Forest.

Forest sinalou que a investigación segue aberta ao non estar claro o desenvolvemento dos feitos e que aínda non se terminou coa identificación dos cadáveres. A Policía sueca cre que o individuo actuou só e, aínda que o motivo aínda non está claro, descartouse de momento que teña conexións con bandas criminais ou con grupos terroristas.

Segundo a televisión pública SVT, o tirador usou unha escopeta de caza, pero a Policía sueca non confirmou esas informacións, nin se tiña licenza de armas ou estivera en contacto cos servizos psiquiátricos.

Dos seis adultos que permanecen ingresados no hospital universitario de Örebro, todos se atopan estables, aínda que cinco foron operados por feridas graves. Todo o complexo educativo permanecerá pechado o resto da semana, aínda que as outras escolas municipais abrirán hoxe con normalidade. As bandeiras ondearán a medio mastro en sinal de duelo no concello de Örebro, o Palacio Real de Estocolmo, o Parlamento e a sede do Goberno sueco.

As autoridades locais habilitaron liñas telefónicas e varios centros para quen necesite apoio psicolóxico. Os reis Carlos XVI Gustavo e Silvia; o primeiro ministro, Ulf Kristersson, e o ministro de Xustiza, Gunnar Strömmer, desprazaranse este mércores a Örebro, en cuxa igrexa principal celebrarase un servizo relixioso para homenaxear as vítimas.