O aumento da incidencia en España case non se reflicte nas hospitalizacións

A pandemia continúa en ascenso, e este xoves a incidencia acumulada a 14 días aumenta 11 puntos, ata os 160,1 casos por 100.000 habitantes. Con todo, este incremento apenas se traduce nunha maior presión das UCI, que manteñen unha ocupación de pacientes de covid–19 do 6,2 %, unha décima máis.

Co novo semáforo, os 160 puntos de incidencia de media en España sitúan o país en risco medio, en liña coa maioría de comunidades autónomas. Só Navarra, cunha incidencia acumulada a 14 días de 462,3 casos por 100.000 habitantes, e o País Vasco, con 350,96, superan este baremo e colócanse en risco alto.

Con risco baixo (entre 50 e 100) atópanse só tres comunidades autónomas: Estremadura (70,3 casos por 100.000), Andalucía (82,7) e Castela-A Mancha (92), ademais da cidade autónoma de Ceuta (73,6).

Segundo o último informe do Ministerio de Sanidade, notificáronse 9.258 novos contaxios e 27 falecidos máis que este mércores, o cal supón xa 87.931 decesos desde o inicio da pandemia.

A ocupación nas UCI por pacientes de covid–19 varía por territorios. Cataluña sitúase á cabeza cunha ocupación do 12,3 %, seguida por Aragón co 11,3 %, Navarra co 10,1 % e o País Vasco co 9,1 %, ademais da cidade de Melilla, 17,6 %.

Por contra, a mellor situación dáse en Galicia e Estremadura, ao redor do 1,5 % de ocupación de pacientes de covid–19. Andalucía e Asturias séguenas cun 2,4 e 2,8 % respectivamente.

Por idades, os menores de 11 anos, non incluídos aínda na estratexia de vacinación, seguen tendo a maior incidencia: 252,6 casos.

E esta incidencia dos menores parece afectar os seus proxenitores, xa que o segundo lugar do grupo máis afectado é o da franxa que vai de 40 a 49 anos, con 188,9 de incidencia acumulada a 14 días por 100.000 habitantes.