Lugo revélase como a cidade galega máis saudable
Só superada por Teruel e por unha vila de Mallorca, figura como no 'ranking' como a segunda urbe en todo o ámbito estatal
A súa contorna natural, a calidade do aire, unha boa alimentación e a abundancia de espazos deportivos son factores clave
Rodeada dun extraordinario patrimonio natural, Lugo é a urbe galega máis saudable para vivir. Así o indica un estudo publicado por un coñecido servizo médico en liña, que sitúa a capital lucense como a segunda cidade do 'ranking' en todo o ámbito estatal, só por detrás de Teruel.
Xunto coas zonas fluviais e os parques periurbanos do seu cinto verde, o informe destaca o paseo do adarve da muralla romana, tamén ao aire libre, e mais a existencia dunha nutrida rede de ximnasios e de espazos cubertos ideais para a práctica deportiva.
"O único hándicap que temos é o clima, pero o bo é que temos centros coma este, que cada vez hai máis deste estilo, onde se pode facer exercicio a cuberto e con profesionais que nos guíen e nos ensinen como executar correctamente traballos de forza, que está demostrado que é o máis importante para a saúde dos cidadáns", sinala Manuel Uriz, director dun centro deportivo.
O informe tivo tamén en conta aspectos como a calidade do aire, a lonxevidade, o acceso sanitario e, por suposto, a alimentación. Neste sentido, destaca a boa proporción de establecementos saudables con respecto aos de comida rápida.
"Moi pouco procesado. E moi fácil acceso a produtos naturais, sexa peixe ou verduras, grazas aos mercados desta cidade", subliña o dietista Sergio Quiñones.
A cidade de Lugo pode presumir de ser, a fin de contas, a única capital provincial que se atopa dentro dunha reserva da biosfera en toda a Península Ibérica.
Centro deportivo Activa3 no barrio lugués da Milagrosa
