O acusado de asfixiar ata a morte un meniño en Santiago vai seguir en prisión

O home acusado de matar por asfixia a seu sobriño de tres anos en Santiago vai permanecer no cárcere ata que haxa xuízo.

Está previsto que sexa a partir do 17 de xaneiro cando teña lugar a vista do caso. Cumpridos xa dous anos de encarceramento, a xuíza decidiu prorrogarlle a prisión provisional ata que Santiago Cepeda Quintela sente no banco dos acusados. Enfróntase ao pedimento da máxima condena: prisión permanente revisable.

A Fiscalía e a acusación popular consideran que asasinou o meniño. A súa defensa argumenta que non é responsable penal debido a trastorno mental ou alienación transitoria.