O 35 % dos españois padece problemas de saúde mental

 O 35,6 % dos españois padece algún problema de saúde mental, segundo o Informe Anual 2024 do Sistema Nacional de Saúde publicado este xoves polo Ministerio de Sanidade.

Os problemas de saúde mental máis frecuentemente rexistrados nas historias clínicas de atención primaria son os trastornos de ansiedade, seguidos dos trastornos do sono e dos trastornos depresivos.

A tendencia é crecente na serie 2016-2023: no caso da ansiedade, pasouse de 62 diagnósticos por cada 1.000 habitantes en 2016 a 111,3 en 2023; no dos trastornos do sono, de 49,6 a 87,3; mentres que os diagnósticos de trastornos depresivos pasaron de 39,1 a 49,3.

No caso da ansiedade, este trastorno tamén se erixe como o máis común entre os menores de 25 anos, afectando tres de cada cen.

Os diagnósticos de problemas de saúde mental son máis comúns en mulleres —afectan 387 mulleres por cada 1.000, fronte aos 323 homes diagnosticados—, aínda que durante a mocidade e a infancia eles están máis expostos.

As enfermidades cardiovasculares: causa de mortalidade

En 2023 producíronse 436.124 defuncións, 220.742 de homes e 215.382 de mulleres, cunha taxa bruta de mortalidade de 902,6 falecementos por 100.000 habitantes.

Así, a cifra descendeu un 7,2 % con respecto a 2022 e un 14,9 % respecto de 2020, ano da pandemia.

A principal causa de mortalidade continúan sendo as enfermidades cardiovasculares, que en 2023 causaron o 26,6 % das defuncións, e o cancro, que provocou o 25,5 %.

Séguenas as enfermidades respiratorias (10,8 %), que aumentaron arredor do 16 % con respecto ao ano anterior debido principalmente ao incremento de defuncións por pneumonía e influenza, e ás enfermidades crónicas das vías respiratorias inferiores.

Pola súa banda, os falecementos por enfermidades cardiovasculares e por cancro descenderon desde 2013. Así, a mortalidade por enfermidade isquémica do corazón diminuíu un 30,1 % en dez anos e a mortalidade por enfermidade cerebrovascular fíxoo nun 29,4 %.

A mortalidade por tumores malignos diminuíu un 12 % desde 2013, sendo os que causan máis defuncións o cancro de traquea, bronquios e pulmón, seguido polo de colon e recto.

Diminúen os suicidios

En 2023 producíronse en España 4.116 defuncións por suicidio, 3.044 de homes e 1.072 de mulleres, cunha taxa bruta de mortalidade de 8,5 falecementos por 100.000 habitantes.

A mortalidade por suicidio mantívose relativamente estable entre 2013 e 2018, observándose un repunte do 11,5 % entre 2019 e 2022. En 2023 diminuíu un 3,6 %.

A obesidade afecta o 15 % da poboación e o 23,3 % da poboación infantil ten exceso de peso

O 55 % da poboación adulta española presenta problemas de exceso de peso: a obesidade afecta o 15,2 % de quen teñen máis de 18 anos, mentres que o 39,8 % padece sobrepeso.

As persoas con menor nivel educativo presentan o dobre de obesidade que aquelas con nivel de educación superior (19,6 % e 10,8 %, respectivamente).

A prevalencia de obesidade na poboación infantil (2 a 17 anos) é do 7,1 %, pero se se considera conxuntamente a obesidade e o sobrepeso, o 23,3 % da poboación infantil ten exceso de peso.

Sobre a actividade física e a alimentación, tres de cada dez persoas de máis de 15 anos decláranse sedentarias no seu tempo libre, e catro de cada dez non consomen ningunha peza de froita ou verdura na súa alimentación diaria.

Así mesmo, o 16,6 % da poboación adulta (de 15 ou máis anos) fuma a diario e o 2,6 % é fumadora ocasional. Ademais, o 31,1 % declara consumir alcohol de maneira habitual.

España mantén a esperanza de vida máis alta da Unión Europea

O informe constata que o 74 % da cidadanía percibe a súa saúde en termos positivos, sendo a percepción de boa saúde maior entre persoas con nivel educativo superior (82,9 %) fronte a quen teñen niveis educativos máis baixos (69,7 %).

A esperanza de vida ao nacer sitúase en 83,8 anos, superando os niveis prepandemia. España mantén así a esperanza de vida máis alta da Unión Europea, con 2,5 anos máis que a media comunitaria.

En canto ás medidas preventivas, a cobertura de vacinación antigripal en persoas de máis de 65 anos alcanzou o 67 % na campaña 2023/24, o que supón un aumento do 23,4 % respecto de antes da pandemia.

Así mesmo, a cobertura de primovacinación infantil mantense por encima do 95 % para todas as vacinas do calendario sistemático.

Gastamos o 7,4% do PIB en sanidade

O gasto sanitario público alcanzou en 2022 os 99.347 millóns de euros, o que representa o 7,4 % do PIB nacional e equivale a 2.079 euros por habitante. Nos últimos cinco anos, o gasto experimentou un crecemento do 28,4 %.

Sobre o funcionamento do Sistema Nacional de Saúde, o 55 % da poboación considera que funciona ben ou bastante ben, sendo a valoración global de 6,28 puntos sobre 10.

Os servizos de urxencias 061/112 e a hospitalización son os mellor valorados, con 7,4 e 7,2 puntos, respectivamente. A atención primaria recibe unha puntuación de 6,29 e a consulta hospitalaria, de 5,87.