Nova campaña de control de patinetes eléctricos da Policía Local de Pontevedra

Pontevedra intensifica a vixilancia sobre os patinetes, despois de rexistrar 15 accidentes, dous deles con feridos graves, e máis de 230 denuncias no que vai de ano.

"Os patinetes aumentaron moito ultimamente e tamén as incidencias, por iso xa levamos tres campañas este ano", explica José Manuel González Abal, xefe da Policía Local de Pontevedra.

O primeiro nestes controis é comprobar que os condutores non circulan pola beirarrúa, levan a documentación e non dan positivo en alcol nin drogas.

Despois toca revisar que o patinete non estea manipulado para circular a máis velocidade da permitida e cumpra con homologación.

"Comproban que o aparato reúne as características de homologación que esixe a norma, que non supera os 25 km/h, que non ten asento e que só circula unha persoa, non poden ir dous".

A campaña desenvólvese polas rúas do centro da cidade e tamén na contorna dos institutos, onde teñen localizado menores circulando a gran velocidade. Por iso, os axentes mandan un recado aos pais destes pequenos pilotos:

"Que miren ben o que lle mercan aos seus fillos. Que saiban que hai unha homologación a unha velocidade, e que non dea máis. Temos detectados nenos de 14 anos conducindo aparatos que dan 60 ou 70 km/h".

A idea da campaña é mellorar a seguridade viaria, favorecer a convivencia entre patinetes e peóns e informar sobre novidades, como a de que a partir de xaneiro estes vehículos terán que dispoñer de seguro para circular.