Nin Putin nin Zelenski estarán na negociación de Istambul este venres

As delegacións designadas por Rusia e Ucraína para iniciar contactos directos entre ambos os bandos que impulsen as negociacións de paz reuniranse este venres en Istambul, segundo confirmaron fontes oficiais de ambas as partes á televisión pública ucraína, Suspilne, e á axencia estatal rusa TASS.

Ucraína enviou xa unha delegación encabezada polo ministro de Defensa, Rustem Umérov, da que tamén formarán parte representantes do Exército e os servizos de intelixencia, segundo anunciou desde Ankara o presidente ucraíno, Volodímir Zelenski.

“Decidín enviar a nosa delegación a Istambul”, declarou Zelenski nunha conferencia de prensa desde a capital turca tras reunirse co presidente de Turquía, Recep Tayyip Erdogan.

O presidente ucraíno explicou que a reunión debe incluír representantes de Turquía e dos Estados Unidos.
Zelenski acusou a Rusia de non tomar en serio as negociacións por rexeitar o presidente ruso, Vladímir Putin, a súa invitación para reunirse persoalmente con el e por enviar unha delegación na que ningún integrante alcanza o rango de ministro.

O presidente ucraíno explicou que a prioridade da delegación ucraína será acordar a declaración do cesamento do fogo que vén reclamando Kíiv desde hai semanas para empezar a negociar o final da guerra.

Zelenski destacou que desde Kíiv viaxaron a Turquía para as negociacións o propio presidente, o xefe do Estado Maior, os ministros de Defensa e Exteriores e os xefes dos servizos secretos, e explicou que non enviou desde Ankara a Istambul a todo o equipo ao non estar ao mesmo nivel a delegación que desprazou alí Rusia.

O equipo negociador ruso na cidade turca estará presidido polo asesor presidencial Vladímir Medinski, o mesmo que encabezou as negociacións con Kíiv en Istambul en 2022. Ademais do Medinski, a delegación rusa estará integrada por un viceministro de Exteriores, un viceministro de Defensa e un alto cargo do Estado Maior do Exército ruso.

Aposta do Kremlin por lograr a paz "tarde ou cedo"

A delegación rusa mantén a súa aposta pola continuación das negociacións de paz con Ucraína en Istambul, a pesar dos continuos aprazamentos deste xoves, aínda que descarta un cesamento do fogo, xa que considera que só servirá para armar o seu inimigo. 

 Rusia está comprometida coa proposta do xefe do Kremlin, Vladímir Putin, de reiniciar o proceso interrompido en abril de 2022.

 "O obxectivo das negociacións directas coa parte ucraína é lograr tarde ou cedo unha paz duradeira", dixo Medinski durante unha breve comparecencia en Istambul fronte ao Consulado Xeral de Rusia.

Engadiu que, ao mesmo tempo, débense "eliminar as causas orixinais do conflito", en clara alusión ao achegamento de Ucraína á OTAN.

"A delegación está disposta a traballar de maneira construtiva na procura de posibles solucións e puntos de coincidencia", dixo.

Medinski, asesor de Putin, destacou que as negociacións serán "a continuación" das que se celebraron en marzo-abril de 2022 e que, "lamentablemente", foron abandonadas por Kíiv.

"A nosa delegación oficial foi confirmada por unha orde do presidente de Rusia e conta coas necesarias competencias e facultades para conducir negociacións", dixo, en resposta ás críticas ucraínas polo baixo nivel dos funcionarios rusos.

Rusia non contempla unha tregua

 Rusia está disposta a falar de todo en Istambul, menos dun posible cesamento do fogo, polo menos antes de abordar os principais problemas que enfrontan a Moscova e Kíiv. 

"Hai que darlles unha oportunidade ás negociacións, pero ninguén garante que todo vaia ben, sen problemas", dixo Lavrov, xefe da diplomacia rusa.

Con todo, o ministro ruso, que non forma parte da delegación rusa en Istambul, descartou unha tregua de 30 días como propoñen Kíiv e os europeos. De feito, asegurou que os aliados occidentais non ocultan o seu desexo de rearmar a Ucraína durante un cesamento do fogo duradeiro para que continúen os combates coas forzas rusas.

Mentres, o presidente ruso, Vladímir Putin, quen declinou a oferta de Zelenski de reunirse en Istambul, mantén un rigoroso silencio, consciente de que o arranxo do conflito depende en gran medida dunha futura reunión co presidente dos Estados Unidos.

Precisamente Donald Trump, de xira por Oriente Próximo asegurou que non haberá avances cara á paz ata que non se reúna persoalmente con Putin e escusou a ausencia do líder do Kremlin nas negociacións de Turquía.

“El non ía ir se eu non ía”, declarou o presidente dos EUA a pesar de que el mesmo condicionara a posibilidade de voar a Istambul á presenza alí de Putin.

Desde a cidade turca onde a OTAN celebraba unha reunión informal, varios ministros de Exteriores da Alianza reprocháronlle a Putin a súa decisión de non aceptar o reto de Zelenski de reunirse cara a cara.

“O presidente Zelenski está aquí en Turquía preparado para falar sobre a paz, mentres que Vladímir Putin enviou unha delegación de baixo nivel só para gañar tempo”, declarou o xefe da diplomacia polaca, Radoslaw Sikorski.

O seu homólogo noruegués, Espen Barth Eide, asegurou pola súa banda que se Putin non está "preparado para dar resultados, haberá máis presión, máis sancións e máis consecuencias".