Salazar abandona o seu cargo en Moncloa tras as acusacións de acoso

Francisco Salazar pediu ser apartado provisionalmente das súas responsabilidades na secretaría de Coordinación Institucional da Presidencia do Goberno despois de solicitar tamén abandonar as funcións que tiña na executiva federal do PSOE.

Tras unha información sobre supostas denuncias de acoso sexual publicada por elDiario.es, o partido informou a través dun comunicado que Salazar pedira ser apartado das súas funcións actuais na Comisión Executiva Federal 

Segundo o PSOE, solicitou a apertura dunhas dilixencias previas de información relativas á nova coñecida este sábado, dilixencias que o partido iniciará de inmediato, "malia non constar no PSOE denuncias ao respecto en ningunha das canles habilitadas".

Pouco despois, Moncloa aseguraba que Salazar tamén pedira ser apartado provisionalmente das súas responsabilidades de Coordinación Institucional da Presidencia do Goberno.

A Secretaría Xeral de Presidencia puxo en marcha os mecanismos establecidos para esclarecer os feitos e determinar se procede a activación do protocolo de actuación fronte ao acoso sexual e por razón de sexo, tal e como establece a Administración Xeral do Estado.

Ata a data, segundo Moncloa, ningún empregado ou empregada solicitou a activación do devandito protocolo nin se tivo coñecemento de ningún feito ou comportamento verbal ou físico de natureza sexual que puidese ser constitutivo dunha actuación degradante, ofensiva ou intimidatoria na Presidencia do Goberno que puidesen afectar o socialista.

Salazar, actual secretario de Acción Electoral e Análise, era unha das persoas propostas por Sánchez para asumir un novo cargo no partido. Concretamente, ía ser nomeado adxunto á Secretaría de Organización.

De acordo con elDiario.es, varias mulleres do PSOE, entre elas, unha traballadora de Moncloa, acusan a Salazar de "comportamentos inadecuados" e "comentarios obscenos" cando era o seu xefe no gabinete da Presidencia do Goberno.

En declaracións á súa chegada ao Comité Federal do PSOE que se celebra en Ferraz, a portavoz do Goberno, Pilar Alegría, asegurou que non puido ler esa información, pero destacou que coñece a Salazar desde hai moitos anos.

Segundo dixo, algúns dos seus colaboradores e colaboradoras na Moncloa estiveron con ela despois no Ministerio de Educación e desde "a súa propia experiencia" sempre lle pareceu un compañeiro "absolutamente íntegro".

Pola contra, a exvicesecretaria xeral do PSOE e actual delegada do Goberno en Asturias, Adriana Lastra, considerou que con estas informacións sobre a mesa, Salazar non debe ser nomeado este sábado adxunto á Secretaría de Organización.

"Eu entendo, e así o falamos os membros do comité de Asturias, que non", recalcou.

Reaccións do PP

Distintos cargos do PP censuraron as supostas acusacións, pero tamén pediron "prudencia".

"Non veño comentar o que fai o PSOE no seu comité executivo pero si digo que o que pasou coméntase por si só", sinalou o líder do PP, Alberto Núñez Feijóo, á prensa á súa chegada ao Congreso Nacional do PP.

Máis dura foi a próxima portavoz parlamentaria do PP, Ester Muñoz. Segundo dixo, "o de Paco Salazar é unha vergoña".