Maduro asegura que pasará "á loita armada" no caso dunha agresión de Washington

O presidente de Venezuela, Nicolás Maduro, asegurou este venres que se o seu país fose agredido "pasaría a unha etapa de loita armada", nun contexto no que denuncia "ameazas" dos Estados Unidos, por despregaren forzas militares no Caribe co argumento de combater o narcotráfico.

Segundo dixo, aínda están nunha "fase política, comunicacional, institucional", pero, engadiu, en caso de agresión, pasarían a unha etapa "de loita armada, planificada, organizada, de todo o pobo contra a agresión, sexa local, rexional ou nacional".

"Pasariamos a unha etapa de loita armada, en defensa da paz, da integridade territorial, da soberanía e do noso pobo", agregou o líder chavista nun acto de activación das milicias cidadás, transmitido pola canle estatal de televisión (VTV).

Así mesmo, sinalou que Venezuela está tamén nun período de "alistamento e preparación" en defensa e que pasará á "despregadura das capacidades defensivas, de adestramento e readestramento de toda a poboación venezolana".

Igualmente, dixo que o pobo venezolano é "pacifista", pero "guerreiro" e que "ninguén" vai "vir escravizalo" nin "hoxe nin nunca xamais".

Deste xeito, Maduro deu inicio ao primeiro día de "activación operativa, organizativa, de toda a Milicia Nacional Bolivariana (MNB), xa estruturada, dos cidadáns e cidadás que se alistaron nas primeiras dúas xornadas", levadas a cabo en agosto, contra as "ameazas" estadounidenses.

Ameaza

Antes, o chanceler de Venezuela, Yván Gil, cualificou de ameaza contra o Goberno de Maduro o envío estadounidense de dez naves de combate F-35 a unha base aérea de Porto Rico como parte da operación ordenada por Washington para combater o narcotráfico no Caribe.

Os Estados Unidos despregaron oito barcos militares con mísiles e un submarino de propulsión nuclear en áreas do mar Caribe próximas ás costas de Venezuela para combater, alegan, o tráfico de drogas que asegura "contaminan" as rúas do seu país.