Morren polo menos 60 migrantes nun naufraxio na costa de Italia
Morren polo menos 60 migrantes nun naufraxio na costa de Italia
Os servizos de salvamento lograron rescatar uns 80 sobreviventes dun bote no que ían entre 200 e 250 persoas
Sucedeu nas proximidades da costa de Calabria nas augas de Steccato di Cutro
Os gardacostas investigan o naufraxio, que deixa moitos nenos entre as vítimas
Os cadáveres de 60 migrantes foron recuperados este domingo fronte á costa do sur de Italia, cando menos doce deles nenos, na rexión de Calabria, despois de naufragar a precaria embarcación na que viaxaban.
Non se descarta que o número de mortos sexa maior, mentres que se puideron rescatar uns 80 sobreviventes que lograron chegar a unha praia da localidade de Cutro (provincia de Crotone), onde están a ser atendidos por equipos de emerxencia desde primeira hora da mañá.
Os sobreviventes explicáronlles ás autoridades que a precaria barca de pesca na que viaxaban entre 200 e 250 migrantes partiu pola metade e moitos dos seus pasaxeiros afundíronse, xa que o mar estaba axitado.
Ao parecer, a barca chocou contra unhas rochas antes de que os migrantes puidesen pedir axuda. Os cadáveres, entre os que hai un bebé neonato e varios nenos, apareceron na turística praia de Steccato e, de acordo cos Carabineiros, están dispersos ao longo de varios quilómetros.
Mentres avanzan os labores de socorro, as autoridades están a interrogar os sobreviventes para coñecer as circunstancias do accidente e a orixe dos migrantes, que, segundo a prensa local, son na súa maioría de Irán, Paquistán e Afganistán.
A traxedia prodúcese tres días despois de que o Parlamento italiano aprobara este xoves un novo decreto migratorio, elaborado polo Goberno da ultradereitista Giorgia Meloni, que modifica substancialmente as operacións de socorro dos buques das ONG.
Entre outras cuestións, a norma obriga a pedir a asignación dun porto tras o primeiro rescate dun grupo de migrantes e a dirixirse a esa localización sen desviarse para localizar outras embarcacións en perigo.
Ademais, as ONG denunciaron en repetidas ocasións que desde hai meses as autoridades italianas asignan portos afastados, no norte e centro de Italia, aos que tardan en chegar ata catro e cinco días desatendendo as súas operacións na zona do Mediterráneo central, onde naufragan a maioría deste tipo de embarcacións.
Traballos de rescate na busca de sobreviventes do naufraxio en Crotona, no sur de Italia
