Un home de 36 anos morre atropelado polo seu propio coche en Palmeira, Ribeira

Un veciño de Ribeira de 36 anos faleceu esta madrugada atropelado polo seu propio vehículo. A súa furgoneta quedou sen freos e levouno por diante. Foi na rúa de Barreiro, na parroquia de Palmeira, no concello de Ribeira.

Sucedeu pouco despois das dúas da mañá nun descampado situado a carón da rúa do Barreiro de Palmeira, no concello de Ribeira.

As 02:20 horas, un particular contactou co Centro Integrado de Atención ás Emerxencias 112 Galicia para alertar de que atopara un home debaixo dun coche. Nesa chamada xa indicaban que a vítima podería estar morta.

Desde o 112 Galicia mobilizáronse os medios necesarios informando o Servizo de Urxencias Sanitarias de Galicia-061, o GAEM e os Bombeiros de Ribeira, así como os axentes da Policía Nacional e da Policía Local.

Unha vez no lugar, os equipos de emerxencias confirmaron o falecemento do home, sen que se puidese facer nada por salvarlle a vida. 

 Os bombeiros de Ribeira confirmaron esta maña que se trataba dunha furgoneta de cor gris, que era propiedade do falecido. O vehículo sufriu un fallo nos freos e pasoulle por riba ao condutor. Estaba aparcado nunha zona sen asfaltar e cunha pendente moi lixeira.

A Policia Nacional confirmou que se trata dun accidente e que non hai indicios de delito.

Lugar no que se produciou o accidente en Palmeira, este domingo pola mañá