Morre aos 91 anos o escritor e académico da RAE Luis Goytisolo

O novelista, ensaísta, articulista, académico da Real Academia Española (RAE), gañador do Premio Nacional das Letras Españolas en 2013 e o Nacional de Literatura en 1992, Luis Goytisolo Gay, faleceu este domingo, 12 de xullo, aos 91 anos na localidade de Vimbodí, Tarragona, informou a RAE nun comunicado, aínda que a noticia se coñeceu este luns.

Nacido o 17 de marzo de 1935 en Barcelona, era irmán do poeta José Agustín Goytisolo (falecido en 1999) e do tamén escritor Juan Goytisolo (falecido en 2017).

En 1958, recén licenciado en Dereito, obtivo o Premio Biblioteca Breve coa súa novela Las afueras, á que seguiu Las mismas palabras (1962).

O primeiro dos libros da tetraloxía Antagonía, dedicada á súa esposa, María Antonia Gil Moreno de Mora, que lle custou varios anos de traballo, foi Recuento (1973). O cuarteto completouse con Los verdes de mayo hasta el mar (Premio Ciudad de Barcelona 1976), La cólera de Aquiles (1979) e Teoría del Conocimiento (1981).

Continuou nos oitenta con outras novelas como Estela del fuego que se aleja (1984), que obtivo o Premio da Crítica 1985; La paradoja del ave migratoria (1987), ou Fábulas (1988).

Goytisolo foi colaborador habitual de prensa (El País, ABC, Diario 16) e membro do xurado de importantes premios literarios; nos noventa relevou o falecido Carlos Barral na dirección da revista literaria Letra Internacional.

En 1992 publicou a novela Estatua con palomas, galardoada co Premio Nacional de Literatura de Narrativa, na que o autor xogaba co tempo, entre a Roma de Traxano e a España actual.

Foi precisamente por mor da elaboración desta obra, cando pensou na creación da Fundación Luis Goytisolo para o estudo da narrativa hispánica contemporánea, que, con sede en El Puerto de Santa María (Cádiz), celebra cada ano desde 2003 un Simposio Internacional de Narrativa Hispánica Contemporánea.

En 1993 escribiu sobre o seu percorrido por trece países ribeiregos do Índico, e baixo ese mesmo título foi premiado polo mellor libro de viaxes pola revista Delibros e deu lugar a unha exitosa serie documental de televisión.

Elixido académico da Lingua Española en 1994 para a vacante do poeta Luis Rosales (cadeira C), Goytisolo ingresou en 1995 cun discurso en defensa da autonomía da linguaxe fronte á influencia da imaxe.

En 1998 empezouse a emitir a segunda parte da súa serie Índico (reportaxes para o suplemento do diario El País) e fixo tamén a serie para TVE Mediterráneo (2000). 

O ensaio Naturaleza de la novela resultou gañador do Premio Anagrama de Ensaio 2013. Este mesmo ano obtivo o Premio Nacional das Letras, en recoñecemento a toda a súa obra literaria.

En 2014, cando o seu irmán Juan Goytisolo lle arrebatou' o Cervantes, o galardón máis importante das Letras españolas, edición na que el tamén estivo proposto, dixo do premiado: "O meu irmán Juan meréceo, e, por cuestión de idade, tíñanllo que dar antes a el. Pasou tamén co Nacional das Letras, que Juan o gañou en 2008 e eu en 2013".

Con respecto á súa militancia no PCE, Luis Goytisolo recoñeceu noutra entrevista en 2014, con motivo da publicación de Cosas que pasan, que nunca creu no marxismo e que se se fixo militante comunista a finais dos 50 foi para combater o franquismo, o cal o levou a unha estadía de catro meses na prisión de Carabanchel.

Goytisolo vendeu en 2015 parte do seu arquivo privado á Biblioteca Nacional, unha serie de documentos representativos da súa traxectoria como novelista, ensaísta e articulista.

O veterano escritor recibiu o 1 de novembro de 2018, de mans do entón presidente de México Enrique Peña Nieto, o prestixioso Premio Carlos Fuentes á Creación Literaria no Idioma Español do citado ano.

Entre os seus últimos títulos publicados figuran Coincidencias (2017) e Chispas (2019), na que presenta textos breves sobre a sociedade actual, nos que non falta o humor.

Estivo casado con María Antonia Gil Moreno de Mora ata o seu falecemento en 1993. Tiveron dous fillos, Gonzalo e Fermín.