Morre afogado un pescador de 73 anos en Raxó, no concello de Poio
Morre afogado un pescador de 73 anos en Raxó, no concello de Poio
O falecido ía nunha embarcación con outra persoa que se salvou
Rescatárono en estado inconsciente, e nada se puido facer por reanimalo
Foron varias chamadas as que recibiu o 112 tras o accidente, este martes arredor das sete da tarde. Distintas testemuñas alertaban de que había persoas na auga pedindo auxilio.
Parece que saíran pescar nun chinchorro diante da costa, á altura de punta Pampaído. Por causas que aínda se descoñecen a embarcación envorcou, e os dous homes caeron ao mar.
"O mar estaba calmo", afirma un veciño no porto. "Penso se pasaría un barco grande por xunto deles e faría ondada", engade. Di que era un "botiño pequeno", sen estabilidade, así que puideron desequilibrarse facilmente.
Mobilizáronse medios mariños, aéreos e terrestres para socorrelos, pero o primeiro que chegou onda eles foi un mariñeiro de Raxó. Saíu ao rescate na lancha e conseguiu subilos abordo, un deles en estado inconsciente. Tentaron reanimalo sen éxito ao chegar a terra.
"Viñeron cos dous e inmediatamente os gardas civís fixéronlle a manobra RCP de maneira constante, ata que chegaron os sanitarios" di un mariñeiro que presenciou o rescate. "Non puideron recuperalo", lamenta.
A vítima é un home de 73 anos, polo que din, moi coñecido e querido en Raxó. Tanto el como o outro tripulante, que resultou ileso, eran xubilados do mar.
